ဝန်ကြီးချုပ် မာမိုဟမ်ဆင်းထံ ပေးသောစာများ

များမကြာခင် ရက်တွေထဲမှာ မြန်မာပြည်ချစ်ကြည်ရေးခရီးသွားမယ့် အိန္ဒိယ၀န်ကြီးချုပ် မာမိုဟမ်ဆင်းဆီကို လိပ်မူပြီး အိန္ဒိယက မြန်မာ့အရေးလှုပ်ရှားသူတွေ၊ မြန်မာ့အရေး စိတ်ဝင်စားသူတွေ ပေးတဲ့စာတွေပါ။

စာတွေထဲမှာ မြန်မာပြည်သွားရင် အိန္ဒိယအစိုးရရဲ့ အရှေ့မျှော်မူဝါဒအတိုင်း စီးပွားရေးကိစ္စတွေချည်းမဟုတ်ပဲ မြန်မာ့နိုင်ငံရေးအပြောင်းအလဲမှာ စစ်မှန်တဲ့အပြောင်းအလဲတွေဖြစ်ဖို့၊ တိုင်းရင်းသားအရေး၊ ရိုဟင်ဂျာအရေးတွေကို ကမ္ဘာ့အင်အားကြီး ဒီမိုကရေစီ အစိုးရတရပ်အနေနဲ့ တိုက်တွန်းစည်းရုံးပြောဆိုပေးဖို့တွေ ၀န်ကြီးချုပ် မာမိုဟမ်ဆင်းကို တိုက်တွန်းထားပါတယ်။

အိန္ဒိယ လူမှုအဖွဲ့အစည်းတွေကတော့ တိုင်းရင်းသားဒေသတွေကို ပစ်မှတ်ထား ထိုးစစ်ဆင်၊ ဖိနှိပ်နေတာတွေ ရပ်ဖို့၊ ရိုဟင်ဂျာတွေအရေးကို မြန်မာအစိုးရအနေနဲ့ ဒီမိုကရေစီနည်းကျ ဖြေရှင်းဖို့၊ ရခိုင်ပြည်နယ်တွင်းမှာ ဒီလူမျိုးစုတွေကို ဖိနှိပ်နေတာတွေကို ရပ်စေပြီး သူတို့နေရပ်ရင်းမှာ လုံခြုံစွာနေနိုင်ရေး ပြောဆိုဆွေးနွေးဖို့ တိုက်တွန်းပါတယ်။

ဒါ့အပြင် အိန္ဒိယ-မြန်မာ ပူးပေါင်းလုပ်မယ့် ထမံသီရေကာတာစီမံကိန်း၊ ကုလားတန်စီမံကိန်းတွေကြောင့် ဖြစ်ပေါ်လာမယ့် လူ့အခွင့်အရေးချိုးဖောက်မှု၊ သဘာဝ ပတ်ဝန်းကျင်ထိခိုက်မှုတွေကို ထည့်သွင်းစဉ်းစားဖို့တွေလည်း ပါဝင်ပါတယ်။

မြန်မာ့အရေးအတွက် အိန္ဒိယပါလီမန်အမတ်များအဖွဲ့ကတော့ မလွတ်မြောက်သေးတဲ့ နိုင်ငံရေးအကျဉ်းသားတွေအရေးနဲ့ ပြည်တွင်းငြိမ်းချမ်းရေးအတွက် စည်းရုံးပြောဆိုပါလို့ ဆိုပါတယ်။

အိန္ဒိယရောက် မြန်မာအဖွဲ့အစည်းတွေကတော့ မြန်မာ့နိုင်ငံရေးအပြောင်းအလဲကာလမှာ စစ်မှန်တဲ့ ပြောင်းလဲမှုကို ဦးတည်ဖို့ အိန္ဒိယအစိုးရအနေနဲ့ ပံ့ပိုးကူညီဖို့၊ မြန်မာနိုင်ငံတိုးတက်ရေးအတွက် ကူညီဖို့တွေ တိုက်တွန်းထားပါတယ်။

ဝန်ကြီးချုပ် မာမိုဟမ်ဆင်းရဲ့ မြန်မာပြည်ခရီးစဉ်ဟာ ၂၅ နှစ်အတွင်း အိန္ဒိယ၀န်ကြီးချုပ်ရဲ့ ပထမဆုံး ခရီးစဉ် ဖြစ်ပါတယ်။ ၁၉၈၇ ခုနှစ်တုန်းက အိန္ဒိယ၀န်ကြီးချုပ် ရာဂျစ်ဂန္ဒီရဲ့ မြန်မာပြည် ချစ်ကြည်ရေးခရီးနောက်ပိုင်းမှာ အိန္ဒိယ၀န်ကြီးချုပ်တွေရဲ့ မြန်မာပြည်ခရီးစဉ် မရှိခဲ့ပါဘူး။

Posted in: မြန်မာ