Ngimna' Hong Tawsawn Nuntakna

ngimna

Read more »

MASAK DING THU 9 TE

Leitung ah mitampite in i masak dingte ki masakkhalo thei den hi.
Ih masak ding thukuate:

1) Pasian gam leh ama dikna zong masa in (Matt. 6:33).
2) Na sanggampa tawh kilem masa inla tua ciang in biakna pia in (Mtt. 5:24).
3) Nangma mit a singluang tang lakhia masa in (Mtt. 7: 5).
4) Topa na Pasian na lungsim khempeuh tawh it in...tua in amasapen leh a lianpen
thupiak hi. (Mtt. 22:35-40).
5) Tu masa inla ngaihsun/geel masa in...(Lk. 14:28-33).
6) Andrew in a sanggampa Peter Zeisu kiang paipih masa hi (Jn. 1:41).
7) Amaute in amau mahmah Pasian tungah kipia masa uh hi (2Cor. 8:5).
8) Vangtung/tunglam pilna zong masa in...(James 3:17).
9) Nangmah in na itna masa nakhahsuah khin hi... (Rev. 2:4).

# Zeisu i itna masa pen khahsuah ngeikei ni. Limtak keemcing den ni.

Laisim mimal tungah Topa thupha omta hen! Amen 

Post by GX Khai

Read more »

KHASIANGTHO' GAH

2:35am Feb 2

Gal5:22-23"Kha siangtho gah' in:itna,lungdamna,kilemna,lungduaina,mi hehpihna,gitna,diktatna,lungnemna,pumpi' deihna khamna te ahi uh hi."
Khasiangtho tawh kidim nuntakzia leh,si-le-sa sung a nuntakzia te Gal 5:16-26 sunga ki gen na sanga a ki ciat zawkna,Lai Siangtho sungah omlo hi.Paul in Kha nuntakna leh si-le-sa' nuntakna te kido ahihna thu bek gen lo in,Kha Siangtho' gah leh si-le-sa' gah te siangtakin hong lak hi.
KHASIANGTHO' GAH;
Si-le-sa nuntakna langkhat ah "KHASIANGTHO GAH" tawh nuntakna om hi.Thu um mite in Kha siangtho nuntakna tawh nungta a,si-le-sa deihnate nusia in,Pasian' deihna bang a nuntak ding ahi hi(Rom8:5-14, 2Kor 6:6; Ef 4:2-3;5:9; Kol 3:12-15; 2Pit 1:4-9).
KHASIANGTHO' GAH TE IN;
(1)Itna; Ngahkik ding leh phattuam na ding ngaihsun lo a,mikhat panpih a,itna,khualna,lungsim neihna hi(Rom5:5; 1Kor 13; Eph 5:2; Kol 3:14).
(2)Lungdamna; itna,hehpihna leh thupha te tung a,lungdamna Jesu Khris a um mite in Pasian tungah a neih uh lungsim ahi hi(La 119:16; 2Kor 6:10; 12:9; 1Pi 1:8; Fil 1:14).
(3)Kilemna; Pasian sungah muan' na tawh lungduai tak a,nuntakna hi(Rom15:33; Fil 4:7; 1The 5:23; Heb 13:20).
(4)Lungduaina; Thuakzawhna,heh baih loh na,lungsim kepzawhna te ahi hi(Ef 4:2; 2Tim 3:10; Heb 12:1).
(5)Mi hehpihna; midang te lungsim na sak kha nuam lo in,mi khat peuh tungah lungkhamna piansak lohna lungsim ahi hi(Ef 4:32; Kol 3:12; 1Pi 2:13).
(6)Gitna; Thuman thutang bek deihna leh diktatna deihna gitlohna mudah in,gitna lungsim bek ki lang khia sak ding cih na ahi hi(Lk 7:37-50).Gamtat hoih lo te thu hilh ding,gitlohna te ki puahpha ding cih na hi(Mat 21:12-13).
(7)Diktatna/Cihtakna; Kamciamna,ki apna te ah thumanna leh cihtakna,midang te' muan' na leh zahtakna ngahna lungsim hi(Mat23:23; Rom 3:3; 1Tim 6:12; 2Tim 2:2; 4:7; Titu 2:10).
(8)Lungnemna; lungnem na in heh tuak na munah heh in,lungnem tuakna munah lungnem theihna,ki pulaak ngamna lungsim hi(2Tim 2:25; 1Pi 3:15)Jesu picin' na et teh ding(Mat 11:29;Mat 23, Mk 3:5),Paul' nuntakna(2Kor 10:1; 10:4-6 leh Gal 1:9);Moses nuntakna te et teh ding in hoih mahmah hi(Gam12:3 leh Pai 32:19-20).
(9)Pumpi deihna khamna; mikhat in a lungsim ngaihsutna leh lunggulhna te a kep zawhna ahi hi.Nisim siangtho nuntakna leh kiten'na kamciam nate tungah cihtakna leh sian'tho nate ahi hi(1Kor 7:9; 9:25; Titu 1:8; 2:5)
Sawltak Paul in a kam vaikhakna nunung pen ah,Kha Siangtho' makaihna tawh hih bang a,a nungta mite thukham in a kham kei hi,ci hi.Thu um mite in hih Kha Siangtho' gah te gah in a nuntak ding uh nisim in kisin ding kisam a,hanciamna leh thukham tawh bangmah a kizop loh lam ki lang sak ding uh hi.
SI-LE-SA GAMTATNA.
Si-le-sa cih kammal in mihing' nuntakna,a hoih lo lunggulhna te a genna hi.Mikhat in a pian' thak khit hang in si-le-sa ngaihsutna,lunggulhna te bei pah lo a,gal lianpen hong suak hi(Rom8:6-8, 13;Gal 5:17,21).si-le-sa deihna bang a gamta te in Pasian' gam luah lo ding ci hi(Gal5:21).Tua ahih man in Kha Siangtho vangliatna suangin khagaldona tawh si-le-sa' gamtatnate nial in sih sak ding ahi hi(Rom8:4-14;Gal 5:17)
SI-LE-SA' gamtatna te in(Gal5:19-21);
(1)Numei tawh mawhna;numei leh pasal mawhna,angkawmnate a gen na hi a,tua te tawh a kizom limte leh laigelh hoih lote zatna zong ahi hi.(Pai20:14;Mat 5:31-32;19:9;Sawl 15:20,29;2:25; 1Kor 5:1).
(2)Kihhuai gamtatna; numei leh pasal kihhuai gamtatna te,ngaihsutna,lunggulhna hoih lo khempeuh ahi hi(Ef5:3; Kol 3:5).
(3)Lunggulh luat khialhna; mi mai ah akilawm,akilawm lo cih te ngaihsun nawnlo a,ama lunggulhna bek leh a utna bek tawh nuntakna,maizum theih loh nate ahi hi(2Kor 12:21).
(4)Milim biakna; kha tuamtuam te biakna,milim biakna,midang muanluatna,Pasian leh ama kammalte sangin na dang khatpeuh thupi sak zawkna te ahi hi(Kol 3:5)
(5)Mibumna; kibumna,dawithu' upna,khutlam etna,dawi biakna leh zatui hoih lo zatna te ahi hi(Pai 7:11,22; 8:18; Mang 9:21;18:23).
(6)Kitot na'ng bawlna; ki langbawl na,ki huat bawlna,kigal bawlna,muhdahna lungsim cih te ahi hi.
(7)Kitotna; kitotna,ki gal bawlna,tungnun' kituhna te ahi hi(Rom1:29 ; 1Kor 1:11;3:3).
(8)Hazatna; huatna,midangte en'na,deihgawhnate ahi hi(Rom13:3; 1Kor 3:3).
(9)Thangpaihna; hehluatna hang kampau hoihlo zatna,tatsiatna cihte ahi hi.(Kol 3:8).
(10)Huaihamna; angsung thu bek theihna,ki thupi muhna te ahi hi.(2Kor .12:20; Fil 1:16-17).
(11)Kiseelna; ki khen na leh ki pukna a piangsak thei Laisiangtho tawh kituak lo a,thu hilhna ahi hi.(Rom16:17).
(12)Kikhenna; pawlpi sung kilem lohna piangsak a,kikhenna a piangsak thei thuhilhna ahi hi.(1Kor 11:19).
(13)En'na; mikhat neihsa deih gawhna hi.
(14)Zukhamna; zunekna hanga lungsim,pumpi ki-uk zawh nawn lohna hi.
(15)Gualnopna' pawikhamna; pawibawlna,zunekna,numei pasal ki uang thuah nate ahi hi.
Paul in si-le-sa' gamtatna thu kiciantak leh khauhtak in gen a,tua bang a,asiat gamtat mite in gupna ngah lo in,Pasian' gam tung lo ding uh hi ci hi(Gal5:21; 1Kor 6:9).
A tawp dong nong simsak man in,lungdam mahmah hi.Khasiang tho gah pan a,hong pai,vangliatna thupha te nang leh na innkuan tungah hong om den ta hen!!!

Read more »

Ih Nuntak na Pasian Minthan Nang (Colossians 1:16)

Na khem peuh pen a kiman na nei aa Pasian in a bawl hi. tua bang mah in mihing te zong lungnuam tawl dam ding aa hong bawl hi na pii mihing te in bang hang nungta aa, ka nuntak na bang ding cihtel teilo in mitampi te ki sia kin uh hi. bang ding nungta aa, nuntak na i dehna bang hiam? mailam ah bang ciding cih thupi mahmah hi.
Pasian in hongbawl aa, amaminthng nading in leh a ma gamzai na ding i nuntak na, i lung sim sungah vang liat na hong pia khin hi. tua i nuntak na khempeuh pen a ma minthan na ding, a ma gel na a tang tun na ding a hi hi. tua a ma hong piak sa nuntak na pen i zat khelt leh tua tungtawn in Pasian in thu hong khen ding cih phawk in. tua mah bang in i nuntak na ki ngaih sut phat kul ding hi.
Pawlkhat in leitung ah ka pen ki sik ing cithei uh hi.hih leitung ah i pian pen Pasian deih na hi aa, Pasian phalloh aa a mawk pian khat zong omlo hi.lei tung ah na pian ma na nu gil sung ah na om lai pek in Pasian gim na sung ah a om khin cih ki phawk in L.S.T sung ah cihi i nuntak na pen Pasian gel na a tang tun na ding hi ci hi( Late 138:8).

Pasian zat theih Nuntak na

Pawl khat te in ka Nu le Pa te pilna nei lo bang mah nei lo a hih teh kei zong khua suak zo kei ning cih ngaih sin in a khang khia zolo zong tampi a om hi. i Nu le Pa a pil, a hau, a zawng cih tawh kisai lo in Pasian sung ah, nung ta a Pasian thu tawh i nung tak nak leh a man hong lamto ding aa hong zang ding hi- a mintang na ding in.

Jame ( 12:18) Nun tak na piak khiat na


Pasian ading in i nuntak na in ki piak khiat aa, a man thumaan thutak te i zui ding a thu pipen hong hi ding hi, tua ahih mah bang in i nuntak an amaa ding a i kipaik thiat leh gim na haksat na te, mi simmawh na, mi et neu na te cih bang i tuak khak ciang in lung kiat loin a mah i let kip tengtang leh hong gual zawh pih ding hi hong mawk suak sak lo ding hi. i haksat na, lung kham na, nat na sat na te sang in hong it na liang zaw hi.
Leitung ah mipil pen mi hau pen pa Solomon kumpi pa in zong bang na cih hiam cih leh "na khempeuh a mawkna pi hi na ci hi." tu hun tu ciang dong in Solomon kumpi pa sang in a pil zaw a hau zaw om nai lo hi.nang zong tua mah bang in koikoi ah na om a, bang bang na sem zong in Hong bawl pa na neih kei leh na nuntak na mawk na pi hi ding hi.
In nuntak na pen ei aa hilo a ei hong nei hong bawl pa Pasian a aa hi, tau a hih mah bang in i nuntak an pen a ma minthan na ding, leh a ma gamzai na ding a hong bawl hi. tua in i nuntak na e a deih na ( aphi) hi.tau a hih man in na nuntak na kei en kik in kua hong uk hiam? cih kisit ki in leitung nopsak na sum leh pai, maw, hih kei leh , Kha Siang Tho maw cih thu pi ding hi.

Read more »

Kumthak 2012 tawh thak khawm ni

Maisak zawhlona in, maisak theilo mawhna hi, Satan nang nuntakna sung ah a lutsak hi teh. Nang tung ah hong mawh te, na maisak leh bekin, vantung Pa Pasian in nang mawhna zong hong maisak pan ding hi. Ahihangin, mite mawhna na maisak kei leh Pa Pasian in, nang mawhna zong hong maisak lo ding hi. Matthew 6:14-15

Khasiatna zungpi sau semsem icih pen, mikhat maisak zawhlona pan hi. Hi zungpi pen, na lungtang sung thuuk tak in zungtha aa, tua in, Pasian hong itna lampi khaktan hi. Pasian i nang hong zatna ding te  zong khaktan hi. Pasian itna midang te nuntakna sung kilatsak nang haksa sak hi. Maisaklo na pen in mite lungkhamna pia pen hi. Mi tampi te in, maisakna lungtang pualo napi ki phawklo lai uh hi. A sunglam thukpi ah kiselcip hi. Khatvei vei mi lungtang natnang, khasiat nang peuh pau eheh lai uh hi. A kinai pih mi te in thuak pen lai hi. Naupan lai in, a thuak kha te a meima pawn bei ngeilo hi.

Maisak zawhlo na icih pen, ki phatsakna khat hi in, Satan, i zawl in zotna khat hi. Mi tung a, khasiatna a pua pua den te, a lungsim cidam lo mite hi un, tua bang lungsim apuak lam zong kithei lo uh hi.

”Heh inla, mawh kei in”: na hehna ni tumsak kei in, dawi aa ding kipia kei in. Ephet 4:26-27 Mi khempeuh tawh na kilem na ding, na siantho na ding hahkat in, sianthona om lo in, Topa kimu thei lo hi. Mite’n Topa dikna taan kha sak kei in. Lungsim khasiatna in mite niinsak hi, hamsatna ngahsak hi. Hebrew 12:14-15 NIV

Pianthakna: Mitung aa, khasiatna bekbek a genden khat pen, a lungtang a nosuah nailo, apiangthak tatak nailo khat ahi hi. Pianthakna in, mi hoihlona te ciamteh lo hi. Lungsim picinna, maisakna lungtang puan silh uh hi.

A tapa a thatpa, ata ding in la

Na tapa hong ki thahlup sak leh, a that pa na tapa ding in, na la zo diam? A mawhna na maisak zo diam? A piangsa khempeuh na ma ngilh zo diam? Na tapa it zah in, na it zo diam? Leitung thupiang tatak khat om ngei hi.

Maisakna leh maakngilh bawlna:

Mawh maisakna icih pen, christian te nuntakna ding, a haksa penpen khat leh, tua lo aa a pianglo khat ahi hi. Nupa khat, tapa khat bek nei hi. Ni khatni guta khat in, a inn luh aa, a tapa in, a va delh leh, guta pa in, pistol tawh na kaplum hi. Guta pa, khantawn thong kia ding in, thukhen zum ah khensata. Tua laitak in, nupa te in, thukhen zum ah bangci gen hiam cih leh, hi ka tapa hong thahlupsak pa- ko kata ding in, khawi nung. Ko ka teek nungin, ka tapa hong vak ding om nawnlo ding ahihman in, hi a that pa in, ko teek leh sih dong hong keem, hong khoi, hong vak hen. Tua pen, ama aa ding, a khan tawntung bawlsiatna thuakna (pusnishment) hi ta hen na ci hi.

Tua thu a zaak ciangin, guta pa zong, khitui naptui luang sa in, misuakta  ahihna lungdam tak leh kisuangtaak tak in, sang in, tua nupa te zong a tapa ii a et ding bang lian in, et ding, kep ding kamciam pia hi.

Bang hang maisak kul:

Midang te mawhna i maisak zawhna pen, ei ading leh amau a ding suahtakna lianpi khat hi. Mi khat i siamlona tawh na sakna, dahna, lungkiatna leh hehna ki vei thei hi. A hihangin mangilh aa, maisak zo kei laileng, tua lungkiatna pen damdam in khasiatna suak thei hi. Khasiatna tawh mite ki kai-awh khathei hi. Mi kimkhat khasiatna tawh, alungsim, tha le ngal, hun te tampi beisak uh hi. Amau le amau ki lungneu sak tawmtawm, hehpih huai kisa tawmtawm uh hi. Mi tung aa heh aa, a sin so sak nilo uh hi. Thudang peuhmah ngaisut ding haksa sa un, nisim nuntakna pen, meigong lungham hong bang ta hi. Nengno cik tawh phunphun uh a, mimawhna ding zonna tawh nisim nuntakna hun te hong zangh aa, (selfpity), ki khasiasak tawmtawm uh hi. Mawhsakna a tuakkha pen aa ding zong, khasiatna van hong gik semsem hi. Khatpeuh thusiamlona hangin, khat in maisak zolo ding cih pen a dahhuai, a thuahlah huai mahmah thu khat hi. Maisakna icih pen in, a nih tuak a ding, van zaangsak hi. Tua man in zongh, nupa kikal ah, maisakna in nupa hihna cidam sak hi. Ki maisak zawhlona leh khasiat luatna lungsim puakte in, mi nih kikal thusia lasia tampi omsak aa, ki naipih te kikal, a diakdiak in nupa kikal kisia sak hi.

 

Teel ding:

Mawhmaisakna i bulpi pen lungsim khensatna hi. A ki khensat ngiat hi. Khetvei ciangin, hong tuacih pen ci-in, na kisa lua aa maisak zo kei ning kici hi. A dang hi le maisak zo mah ning, ahihang tu aa pen maisak zo kei ning kici thei hi. Mi khat ii mawhna pen, lian lua in, maisak zawhlo ding om hi ci in um khang. Maisak noplo man hi zaw hi. Ngaihsun pha in. Tuahsiatna khat pen, thuakhak salua, khasia lua maisak nuamlo hi zaw hi. Ki khasiasak tawm tawm aa, kua mah maisak sawm zo lo,  mi mawh zon tawh lungkim peuhmah lai. Mi khatpeuh in, lungkiatna leh dahna nei thei hi.

 

A hih hangin, kua mah in, mawhna kol khihna leh maisak zawh lo na lungtang puak den ding thuneihna (rights/akhuan azi) kinei lo hi. Maisak ding haksa mahmah thei ding hi.  Maisak ding khensat in, makngilhding zong ut mah taleng, lungsim sung ah ki phawk kha lai thei hi.  Maisak zo nai lo kai ve maw kici theihi. Mawhmaisakna in, telding khat, ken zong maisak ding khensat ta, ka khensat khitciang, ka feeling in bangbang genta leh ka maisak ding hi, a dang om lo hi.  Ih feeling te pen, khasiatna lam hong bei pak lo kha mah tase leh ka maisaksa mah hi. Tua bang ciang, koi ci ding ka hiam?

 

Maak ngil ding

Maisak ding i khensat khitciang in, thupiangte nunglam a koih aa, maakngilh bawl ding hi. Mangilh ding icih ciangin, a piang khempeuh i khuaksung pan phiat ding cihna hilo, tua dan haksa ding hi. Mangilh ding icih teh, gen kikik phun kikkik lo ding cihna hi. Makngilhna tuipi sung ah vapaai ding, ngasa mat dan in, siikawi tawh man kik kik lo ding cihna hi. Deih phat lo khat, a om kikciang in, leuleu aw ei ci a, i zi te, i pasal te khawng va hap se lo ding cihna hi. Khat peuh i, kicin loh na, khialhna khat maisaklo a, phunna, ciakna nengno cik a om sial ki kawkna te in, kiamsukna pia zaw hi.

 

Mi kicinlona a maisak zolo te tawh om khop pen, a puak kham ding time bomb khat tawh kibang hi. Mi khialhna a kawk nuam phadiak khat tawh nuntak a haksat dan pen, khialna neucik om sial- ak tawphun bang hi ding cihna hi. Pasal phunphun zong om thei hi. Pasal hang hang zong om thei hi. Kidop huai hi.

 

Tua bang, mi phunphun thei khat in, Hazaa alai a meek khak na leng, hong phunsan lai ding hi. Maisaksa, maakngilhsa khat ahih aa leh phuang kik kik se dah in. Saan hak sa kha ding hi teh. Lungkim lona khat, ki im tentan ding cihna hilo aa, i lungsim om zia te i kigen ding mah hi. Mi lungsim tawh zong saikak thei ding leh kim le pam tawh zong etkak ding kisam hi. Om na mun le gam te tawh kizui in zong, a hoih lam in nuntak thei ding kisam hi. Mun khat te ah, sin sona te, khasiatna te taanglai thei hi. Tua bang cing, bang hang in om sak lailai ka hiam, cih kidot ding kisam hi. Ka kampi tawh maisak aa, ka takin maisak gai zo nailo kai tam maw ci in kidong in.

 

Ih deihna bulpi pen, mi khatpeuh kicinlona te i lungsim sung ah i phawk khakciang,sinso gawp a, khasiatna te om saklo zaw in, tua bang kisapna khat om ngei cih ciang ding kisam hi. Zi le pasal te kiang, tua lai tua ci, tua lai tua ci cih dandan aa, ciaptehna te omsak nawnlo ding kisam hi. Mi kicinlaak na te sim sim ding hi lo hi. Makngilhna tuipi sung ah paih khitciang, kaih khiat kik kik ding hi nawn lo. Ei leh ei mahmah zong, i ki maisak zawh phot himhim ding kisam hi. Kimkhat ten, ka hahkat ciang, kiam semsem, sia semsem ing ci in lungkiat sawm thei hi. A mau le amau a kimai sak zo lo ten, Zeisu in zong hong maisak zolo ding, ka mawhna lian lua ci in ngaisun uh hi. Zeisu in, maisak zawhlo neilo hi. Ei le ei zong, Innkaun sung, nupa kikal, mimal kikal, ki maisak in, mailam masuan zop ding ahi hi.

 

Mi gensiatna in Khasiangtho beng khia:

(i) Aniin, a kih huai munte ah khasiangtho teng thei lo hi. Zu, zatep, khainii leh drugs tuamtuam te zatna khasiangtho teng theilo hi. Inn kiphiat lo na, inn niin te ah khasiangtho teng thei lo hi.

 

(ii) Tua mah bang in, lungsim niin te lungtang leh inn te ah khasiangtho teng thei lo hi.Lungsim niin icih te pen, mi hoihna sang, misiatna a gen nuam zaw te ahi hi. Thu sia bek bek a kam sung uh pan, a phul khia sak te a hi hi. Sun tawh zan tawh misiatna ding bekbek a ngaihsun te  ahi uh hi. Tua te lungtang sung ah khasiangtho teng theilo hi.

 

(iii) Mi kicinlahna tawh a buai nuam phadeuh ten, a kikhel ding uh thubaih hi lo hi. Mi hoihlona gen pen, zatui in nei uh hi. Bing (zakaang) in, mi gensiat zangh uh hi. A zing an leh a nitak an kam limtuam sa phial uh hi. A hihangin, mi na gensiat ciangin, dawite nih le thum, in hong umcih pah hi. Dawite thusia huai hi. Ahihangin, mi gensiatna mun ah khasiangtho om theilo hi. Khatvei teh, izi i pasal te khial khakna gen kul zong om hi. Tua hi kei leh a kiphawk khalo thei hi. A hihang in, mi khialhna na gen ciang, mawhsaknopna tawh kawk gega se ken la, na kikhel kei aa leh ci in, altimatum khawng pia se dah in. Nang zong, khial thei cih kiphawk in la, nang khial nasak khat, mi aa ding a maan mahmah zong hi thei cih phawk in.

 

Ki tel khialna:

(i) Mihing te kikal, ki telkhialhna om icih pen, i theihna level kikim lo hi pi pen thei hi. Ih sandan level kikim lo hi thei hi.

 

(ii) Mun khat te ah, a thei hetlo pen khat in, a thei pen ding ut cih zong om thei hi.Kim khat te’n, kei taltak pen ka hih ciang ci in, mun khempeuh ah thusapi ut den hi. A munmun aa, na sem ding kiguan khin napi, kua mah i sawl peuhmah lo, mi khempeuh sainuam, mi khempeuh tung aa chairman za amah le amah kiguan tawm. Amah le a mah inspector pi, ai kei leh hausa thuzeek pi kiguan tawm nuam pahpah hi.

 

(iii) Mi khempeuh hawmthawh nuam lai in, mi kicinlah na ding zong zong in, phunciak den cih zong om thei hi. Hi bang mite om na ah, kilemna leh khantona om theilo in, ki telkhialna, ki pumkhat lo na leh kiamsukna piangsak hi. Hi bangmi te’n kipum khatna suksiat ding nakpitak in hahkat in, gamtang uh hi. Nupa kikal ahizongin, koi koi ah, amau mahmah in, hong kikhel nop kei aa leh kuamah in, khel theilo ding ahi hi. Khantona ding sang, kiamsukna om leh a deihzaw te ahi hi. Makaai te tawh nasep khop theihna pen, khantona maleep hi aa, makai te thusim lo aa, tangpekna- makaai khat pepeuh thusim lo a, langdo nopna pen kiamsukna malep hi.     

 

A vekpi in maisak in:

Midang kicinlahna khat imaisak aa leh a vekpi in i maisak ding hi. Themcik zong siit bawl lo ding. Maisak cih khitciang, kamal gingkhia dungzui in, i taksa mah in i zuih sak ding hi. Ih lungsim tawng ah a themneng kheet ding hi lo hi. Maisak khitciang, maisakna len suak in. Kicinlahna a om beh te ah, na maisaksa kipsak suak in la, makngil bawl zaw in.

Thusia gente thusia in bawm:

(i) Siatna agengen te, thusia in bawm takpi hi. A inn pan thupha kiza ngeilo in, mi kiciatlona teng ki za nilo hi. Amau en leng lah, agensiat te sang, hoihzaw tuan peuhmah lo. Sia zaw lai thei hi.

(ii) Na lungkimlo na te ngaisunsun nawn se dah in. Phunphun, ciakciak lecin, na sin so sak tawmtawm ding hi teh. Nang ading phat tuamna hong pia lo ding hi. Lung siatna a kiguan phapha na hi lel ding hi. Na lung zing ding a, na kim le pam te lung zong zing sak ding hi. Siatna kilawhsak ken la, thupha kilawhsak zaw in. Na kam pen thupha kizelsakna ah Pasian hong zat hiam? Na inn pen, thupha kizelsakna in Pasian hong zat hiam? A hih kei leh na kam pen, thusia kithehthang sakna in, Khanin hong zat ahiam? Na inn pen, na lengla tekiang thusia kizelsak nang khanin in hong zat ahiam, ki sitel dih in.  

(iii) Mi khat na maisak ciang, na kamal, na lungsim, na nuntakzia khempeuh tawh maisak takpi in. Makngilh ding baihlo ding hi. Tua mun ah, Pasian ko in la, huhna ngen in. Leitung si le sa hangin, khasiatna te, a ven nang vantung huhna kisam hi. Pasian bek in, lungdaihna, maisakna leh maban zop kik theihna hong guan thei hi.

Mawhnei hi ing:

Mi na mawhsak ma in, nang le nang nisim bangzah khial kha gige na hiam cih ki phawk masa in. Tua hi leh, mi kicinlahna te na maisak nang hong baih zaw ding hi. A mawh ngeilo, a khial ngeilo, Pasian in kei mawhna avekpi maisak zo ahih leh, nisial in a mawh den, keimah in, ka mihing pih te, bang hang maisak zo lo ding ka hi hiam cih ngaihsun in.

Bangzah vei maisak ding:

Zeisu in, 7 mun 70  vei = 490 vei na mawhna te kimaisak uh na ci hi. Tua ii deihna in, a tawntung kimaisak zo ding a deihna ahi hi. Zeisu thungetna ah, kei tung aa, hong mawhte ka maisak mah bangin, kei mawhna zong hong maisak in, hi mawk hi. Mi mawhna khat ih maisak ciangin, Zeisu in ei mawhna zong hong maisak ding, na hi pan phing mawk hi. Mi tung aa, ih hehna, veng ngei kei aa, maisak zo ngei kei lehang Zeisu in zong, imawhna te hong maisak zo lo ding na hi pah hi.

Galte it ding:

Christian hihna thukhun bulpi khat ah, igal te it ding hi ngiau mawk hi. Hi pen thubaih deklo khat hi. Kua in hih zo mawk diam? Na galte na it un, na galte ading thu na ngetsak un, Zeisu in ci lai hi. Zeisu singlamteh tung a kikhaih lai in, amah athat te ading- thungetsak lai. Pa aw, amaute un bang bawl cih theilo hi, amawhna maisak in cilai hi.Stephen zong in, Zeisu thunget bang lian mah in, amah athat te mawhna a kimaisak ding, Pasian kiang ah thum lai hi. Ei Christian te pen, tua tawh ki leh bulh in, mi kicinlah nate zon ding leh kawkding ki taak lah mahamh zawsop hi hang.

 

Nupa kikal ah, kimaisakna bulphuh leng, i lung hong vak zaw in, ki suakta a, lungnopna hong ngahsak hi. Ka pasal khial thei, ka zi khial thei, ka khial uh ciang, ki maisak zo tuak ung- cih lungsim na puak takpiciang, nupa kikal hong nuam pan, innkuan kikal hong nuam pan ding hi. Khat le khat kikal, kimaisak na om lo in, nupa le innkuan sung nop ngeilo ding hi. Bang hang hiam icih leh mi khial thei vive ngentang, nupa kop leh innkuan te i hi hi. Ki maisakna in lungmuanna, lungdaih na hong ngahsak hi.

 

Ki cinlahna, khialhkhakna te pan, thuahzawhna leh kimaisak zawhna te bek in, lungdaihna le lungmuanna te hong pia thei hi. En ih maisak maksak lo in, Zeisu kiang pan maisakna kisang theilo.

 

Pasian in, Pianthakna taktak kum 2012 sung ah hong ngahsak ciat lai ta hen.

 

Pu Tong Seal

 

Read more »

Hamsiatna ii Kum thak kibeel hei ta!

Hamsiatna ii Kum thak kibeel hei ta! 

Rom. 6: 23

Thupha kipaih peuhmah a hoih lo omlo hi.
Mihingte in pen thupha kinei lo a, hamsiat bek kinei hi. Tua ahi manin
ih kihamsiat siat lai leh nak tangtun lua mahmah hi. Thupha bel ih
kipaihpaih nangawn zong deih bangsa nai lo hi hang.

Bangzah ta in kum thak ahi ta zongin na pianthak kei leh kumthak
thupha a nei lo hi teh. Nei lo ka cihteh thupha paih ding a nei lo na
hih banah, ngah ding zong a nei lo na hi hi.

Kum khat bei-in, a thak khat ong suah simin kum khat ta na sihding lam
tawh a kinai zaw na hi a, kum khat ta a tek suah zaw, kum khat ta lui
suah zaw na hi hi. Kum thak tawh a si khawm zong kitam mahmah hi. Hamsiatna ii kumthak tawh a tonkhawm sihna han Kawlpi han (Kalaymyo Han) zong abeisa kum 2011 Dec 30 ni a kipan dim lua ahih manin kikhak ta a, tua kum thak 2012 January kha pan kipan han thak mun ah kivui ta ding cih thu kumpi in kip sak ta hi.  Kalaymyo Han lui pan Han thak ah maw? Han thak lam zuan ni ei!

Ahi zongin mihing' muhna ah bangmah na hih pah loh hangin, a piangthak
mi khat hi-in tua  a lian mahmah hotkhiatna thu a thudon pa/nu khat na
hih leh nang adingin kum ong thakin, na sih ding a nai zawk hangin,
Paul bangin ka nuntak lai leh lah a zian, ka sih leh lah a meet, Khrih
tawh mangkhawm ding ka hih manin hoih zaw kaan lai na ci thei pan ding
hi.

Ih kum thak thupha ding pen Pasian gam le a deihna ii a dikna, Jesuh
dikna puan bangin silhin, diktang mi hih ding mah zong masa peuh
lehang hih a dangdangte....Matt. 6: 32-33.
Leitungah puan khem peuh lakah a hoih pen amanpha pen peen Jesuh'
dikna puan pak ahi hi. Labu sungah, "Ama' dikna puanpaak silh a ka
thawh ciang,..."

Hun tawp ni ciangin, Jesuh le a dikna puanpaak a silhlo mi peuhmah ii
thupha khempeuh hamsiatna hong suak dinga, ahi zongin Jesuh le a dikna
puanpaak silh mi tua diktangmi, tua thu-ummi peuhmah ii tu laitaka a
ngah a kihamsiatna le thuakna khempeuh thupha hong suak ding hi.

Kum thakin thupha nei lo a, hamsiatna le mawhna ii thaman sihna bek nei hi.
Ahi zongin nang le kei in tua ih belh muanhuai Suangpi Jesuh Khrih
upna hangin sihna le mangbatna tawh ong ngak gige kumthak ih cih pen
thupha tawh kibeel hei thei ta hi.

Kum khat ong thak simin, kum khat ta a lui zaw na hi a, kum khat ta na
sih ding hun tawh a kinai to zaw na hi hi. Ahi zongin Gupngaih mi,
piangthak mi, a suakkik mi khat adingin kum khat ong thak simin na
upna sungah khangcinna thak khat tawh na inn a lamlam na hi a, na up
Jesuh tawh zong a kinai to semsem na hi hi. Sihna lim guam thukpi sung
nangawn na nawk hangin na lau kei ding hi. A molhtum le a ciang khut
ahi tua a ma' dikna le a geen banglo Pasian' kalh zuihzawhna thu in
nang hong kem dinga, tua pen a sihna le a thawhkikna ahi hi.

Pasian in thupha nei a, thupha in Pasian nei lo hi. Itna pen Pasian hi
lo a, Pasian pen itna hi. Itna in Pasian uk lo a, Pasian khutnuai ah
itna om hi. Pasian hihna tampite lakah itna zong Pasian hihna khat ahi
hi. Pasian pen itna hi. Pasian pen Siangtho Pa hi. Pasian pen Thukhen
ding pa hi. Pasian pen hihna thum tawh kidim Pa Ta Kha ahi hi. A dangdang zong om lai...

Luck has no God. God has blessing. Christian te in Topa' thupha cih kammal zat
ding hi a, na kaam pha ou! cih kammal zat ding hi lo hi. Be good luck
is pagan. May God bless you is godly.  Hong tung ding kumthak sunga
thupiang ding khempeuh kaam thu tawh kisai lo dinga, Pasian' thu tawh
kisai zaw ding hi. Pasian' thu thu cih upna pen upna maan hi a,
Pasian' thu kei' thu, kei' thu kei' thu cih thu pen upna maan lo ahi
hi. Ih neih hamsiatna ii a gah khat pen kum thak tawh sih zuan khawmkhawm na hi zaw a, ahi zongin ih Topa Jesuh Khrih tawh ih kipawl theih manin,
nuntak tawntungna thupha ih kipaih ih kipia, ih ngah ih sang thei ta
hi (Rom. 6: 23). Hamsiatna ii thupha kibeel hei ta!

Evan. Suang Dal
No. 123/ Thazin 2
Kalaymyo

Read more »

KHA SIANGTHO DAHSAK KE'N

Rev DR Kham Khan Khai

1993 kum Apr.14-23 sung Mawlamyaing ah Lungdamnathu .ka tangko lai-in tuuvun silh ngia honkhat tawh ka kituak kha a, Kha Siangtho sang loin nial uh hi. Kha Siangtho pen Pasian hi. Kha Siangtho lo tawh a ma uh tun zo lo ding hi (zek.14:6).

Kha Siangtho pen nunnemin migi mahmah ahih manin a dah thei lo ding ka sak leh a dah thei na hi mawk hi (Efe.4:30). Kha Siangtho loin kipiangthak thei lo a, Kha Siangtho lo tawh sianthona le vangliatna kingah thei lo hi. Tua ahih manin Kha Siangtho i dahsak loh nadingin Ama paizia tawmkhat ngaihsunkhawm dih ni.I. Kha Siangtho yen Pasian hi.

Pasian in van le lei, ni le kha <le aksite a bawl lai-in Pasian' Kha in tui tungah om hi (Pn.1:2). Kha Siangtho pen mihing a kipiansak laitakin zong na om khin a, (Pn. 1:26). Moses hun lai-in zong na omin kamsanna a piangsak Kha ahi hi. Thuciam lui hun Iai-in Pasian' mizat kamsangte, siampite le thukhente tung bekah om hi. Thu-clam thak hun ciangin nungak siangtho Mari a gaisak Kha ahi hi. Topa Jesu tui a ki­phum khit ciangin a tungah vakhu bangin khawl a, (vit.3:/6) Pentecos ni-in mei bangin kilang hi (St.2:34). Nungzuite hun a kipanin tuni dong nasem ahih manin tu­hun pen Kha Siangtho hun kici hi.

IL Kha Siangtho dahsak ke'n.

I tapidaw nuntakna ah i theih loh kalin Kha Siangtho i dahsak hun tampi om kha ding hi. Kha Siangtho dahsak pen piangthak nai lote hi loin piangthaksa teng mah kihi zaw hi. Nu le pa a hehsak a dahsak zong a veengte khawng hi loin a tate mah hi. Thu urn mi khat in Kha Siangtho a dahsak ciangin thu urn mi sungah Pasian tawh a kizopna nidang zah hi thei lo, a lungdam ding zahin lungdam thei lo, a lawp ding zahin lawp thei Flo hi. Kha Siangtho i dahsak theihna ahangte kikum ni.

(a)Kimuhdahna khempeuh (Efe.4:31): Na pianthak zawh mi khat beek na mu­dahngei hiam? I pianthak ciangin ei bek mah a siangthopenin i kiseh a, midangte thupi i sa lua kei hi. Khat veivei ciangin mi ommuang khat kitangmuhdah thei gige hi. A omzia-a tatzia khat mitdong sa-in kimudah thei hi. Tua bangte pen khat veivei ciangin i kikholhpih i lawmte i innkuanpihte khawng na hi thei lai hi.

Lai Siangtho in muhdahna pen mithahna (11n.3:15) na ci hi. Mi kithat gen loh mi kitawng mu le'ng zong i lungnuam lo hi. Tua sanga lauhuaizaw mi thahna pen clahhuai mahmah ding hi. Mi khat i muhdah leh Pasian muhna ah mithat suak ihih manin Kha Siangtho a dahsak ihih lam kiphawk ni.

(b)Hehnathempeuh: (Efe.4:31)Hehna cih pen mi khatpeuh tungah i lungkim lohnate cihna .hi. Mi pawlkhat in a hehnate kuama tungah gen loin a lungsimah ciamteh hi, I Pasiarrin mite' mawhnate ciamteh loin maisak hi. Tua ahih manin mite mawhna ciaptehna irpltha Siangtho dahsak hi:

(c)  Thangpaihna khempeuh: (Efe.4:31) Thangpaihna cih pen kiphasak, kihi­sak, amah bek maan kisa, lungkim zo lo, kiniamkhiat zo lo, cihnopna hi. Na thang­pai ngei hiam? A thangpai den mite'n mi tawh kilem hun cih nei ^,ngei lo hi. Mi tawh a kilem ngei to khat Pasian tawh kilem dingin na urn hiam? Thangpaihna pen Satan kiang pan hong pai hi (Isa.14:13-15). Satan' khaici ahi thangpaihna na sungah a om Iai teng Kha Siangtho in na Iungtang sungah mun ngah lo a, tua^,in Kha Siangtho dahsak cih phawk ni.

(d)Hansanna khempeuh (Efe.4:31): Hansanna cih pen lungkim lohna hanga paukhiatna hi a, a diakdiakin Nu le paten tate tungah a zat kammal -hi =zawdeuh hi. Lam khat panin awtolna zong kid thei hi. Nu le paten tate tungah bangzah vei awtol zangin na hang ngei hiam kisittelhuai hi. Tua in Kha Siangtho dahsak hi. Tua bangin awtol na zat ciangin •nnkuan sungah ki-itna kiam semsem ding a, kithutuah Iohna khang semsem ding hi.

(e)  Mi gensiatna khempeuh (Efe.4:31): Mi gensiatna cih pen a hoih het lo khat hi a, lah a kinakzat mahmah khat hi citciat hi. Leitungah mi a gensia ngei to kua a om tam? I Siapa ading thu i ngetsak sangin gensia thei zawsop hi. Mi teng gensiat i hat mahmah a, ei lah bangmah ihi tuan kei hi. Lai Siangtho in na vawh bangin na at ding (Ga1.6:7) ci ahih manin mi i gensiat leh ei zong hong kigensia ding a, mi thupha i piak leh thupha hong kipia ding hi. Mi i muhdah leh •ni'n zong hong mudah ding a, mi i it Ieh mi'n hong it ding hi.

(f)Hazatna khempeuh (Efe.4:31): Hazatna cih pen amah bek in nei nuam, midang neih ding phal lo cihna hi. Hazatna nei mi khat sungah itna le deihsakna om lo ahih manin Kha Siangtho in luah thei lo ding theihsa hi. Tua in Kha Siangtho dahsak hi.

III. Kha Siangtho omna ah Iungnop suahtakna om  (2Kor.3:17): Laphuak slam Sia Thawng Za Kim in a nuai bangin la na phuak hi.

Topa Nang omna peuhah ka kha in zong nuamsa hi.

Huatna enna kitotna om ngei lo,

Sunkim ka lunggulhpen Nang, zan ciang ka zatmang na hi,

Nang omna peuh ka kha in nuamsa hi.

Nang omna peuh ka kha in nuamsa hi,Nang omna peuh ka kha in nuamsa hi,                    
Sun le zan a tawntungin kei khamuanna Nang na hi.
Soucre:fga Tulsa

Read more »