Zomi Tangthu Khen Pi ( 22 ) ah Zom

6. A HEHPIH HUAI LUAN VUNG’ TANGTHU

Sakhi a pi san a no san cih paunak deihna na theih nop leh hih tangthu kikum dih ni:

Tuma kum tampi lai-in Neisok bawk mual tawh a kigalsai linlianna munah khua neu khat om a, Tua khua-ah Pu Vai akici mi khat om hi. A mah pen pasal picing, a mel hoih, a thacing, a thahat, agal hang mi khat ahi hi.
Tua hun laitakin a khua kim vuah nungak mel hoih a minthang, Ciin Cing, Nel No, Luan Vung a kici nungak thum om hi. Ni khat ni-in Pu Vai zong tua nungakte lim dingin hong paikhia hi. Khua sung a lut ciangin Ciin Cing tawh kimu pah a, Ciin Cing in, “Ka lai Pu Vai, nang hong pai maw? Ka inn vuah hong hawh o, ka nu zong lengna do siam a kigen hi in, nitak simin tangvalte zong inn dimdimin hong hawh uh hi,” ci-in a gen ciangin Pu Vai in a lungsim sungah, “Hih nu pen mi kiphat nuam khat hi, ci-in a om dan diksa khollo ahih manin paisan phot hi.
Tua ciangin Nel No’ kiangah hong hawh leuleu a, Nelno in, “Nu, Pu Vai, nang ong pai maw? Hong tu o, ci-in tutphah a piak khit ciangin tawmvei hong kiho uh hi. Pu Vai in, “Nelno, tu laitakin na khua sung vuah nungak kua hoih pen ding ahia?” ci-in dong a, Nelno in, “Thei khange mawtaw, Ka lawm Ciin cing lah asam kil deuh ci ven, Ka lawm Luan Vung lah a khuk tuah deuh kici ven, Tu lai thu khut tung lum leh bang hi kei leh, kei ong kici pian hi ven,” ci-in nu seisai kawmin gen hi.” Pu Vai zong Nelno’ thu gen leh a lungsim kituak sa lo ahih manin tawmvei a ho lim khit uh ciangin, “ka vah nopna om in mundang na pai phot dih tawnge,” ci-in paisan hi.

Tua ciangin Luan Vungte’ kiangah hong hawh leuleu a, Luan Vung’ nu in, “Nu, Pu Vai, nang hong hawh zenzen maw, nuam si ung, nang nong hawh nadingin ka inn uh kilawm kei ta buang in,” ci-in Sial kongah tuibuk tawh na dawn hi. “A nuam ta kei zongin na tu phot dih in maw,” a cih kawmkawmin inn sungah zu bel khat lupsa tawh hong pusuak hi. Tua ciangin Luan Vung’ nu in, ak khat go-in inn sungah tangngan huanin, hong kipei a, Pu vai in innlimah zubel khat kalkakin na tu himhiam hi. Luan Vung zong a pau kawmkawmin sum tawngah niksing khat tengin an su-in hong phia saisai hi. Pu Vai zong innlim pan Zu a tep kawmkawmin sumtawng a an su a om Luanvung’ tan pak lenlen muhnop sa-in a zu a tep ding nangawn mangngilh kha liang hi. Luanvung in, “Pu Vai na zu kang ta ahia,” ci a leihsak suk ding a a pai leh, Pu Vai in, “Kang nai kei e,” ci-in maizum pian kawmin dawn hi.
Nuam takin tu khawmin Pu Vai in zong Luanvung pen a om dan leh a gamtat diksa-in iplah mahmah ahih manin a zi dingin paupih pah hi. A nu in zong awi ahih manin kiteng dingin thuciamna a neih khit uh ciangin Pu vai zong khua lamah ciah dingin hong kithawi hi.
A khua a tun ciangin Pu Vai in, a hauhsak pih, a upatpihte’ kiangah Luan Vung tawh a vai teng a gen hi. Tua zawh asawtlo-in upate zong Mopi dingin kuan pah ngeingai uh a, Pu Vai leh Luan Vung in kitenna pawi limtakin hong bawl uh hi.
A kiten zawh uh kum nih khit ciangin tapasal khat nei uh a, Tua banga ama sung pan a piang tapasal khat a neih ciangin Pu Vai zong, nuamin, A thah amat a tapsakna-in a min dingin “Do Thang” phuak uh hi. Do Thang asuah zawh asawtlo kum nih khit ciangin, kamsiatna tawh Pu Vai a ci na-in hong si hi. Pu Vai a sih ciangin Luan Vung zong dahin kapkap hi.
Luan Vung pen numei mel hoih ahih banah a lungsim hoih, a thusiam, apil mahmah numei khat ahi hi. A khua sung tangvalte in zi dingin nungak dangte’ sangin iplah zawh uh hi. Tua ahih manin, Nitak simin tangvalte Luan Vung helin innah hong hawh pahpah uh hi. Tangvalte in, “Pi Vung aw, Na ta lah neu lai-in nang lah khangno lai na hih manin, pasal nei lecin hoih ding hi. Bang hang hiam cih leh, tu lai mite pen ih ngak hangin nidang ciangin a nu a pa thu don lo, akhasia sak tampi om hi. Tua hun ciangin pasal nei nuam mah lecin zong, teek ta ding cin a, pasal na deih hangin kuamah in hong deih nawnlo ding uh hi. Mi’ hong ngaih lai na khangno lai-in pasal nei in,” ci-in va zol thei zel uh hi. Luan Vung in, “Tangvalte aw, kep dah khual dahna-in hong nei kei peuhmah kei un bang hang hiam cih leh hih ka tapa a dam lai teng pasal dang neihsan ding ngaihsun thei ke’ng, tua ahih manin hih bang thu ka kiangah kua man hong gen nawn kei un,” ci-in vaikhak hi.
A nu in a tapa it lua mahmah ahih manin atapa kum sawm bang a phak nangawnin a hawh a ciahna-ah pua ngangngang kawikawi hi. Do Thang zong hong tei to pianpian ta a, anu’ thu a kawi amau-in mang hi. Tua bang a Do Thang in anu’ thu a suk a to-ah a man ciangin Luan Vung in, ka tapa ka ngaihsut mah bang ei,’ ci-in nuam mahmah hi.
Do Thang hong khang toto-in kum 17 bang a phak ciangin ki tangval sak nuamin hong phia geuhgeuh ta hi. Tua hun laitakin a khua sung vuah Nungak melhoih khat, a nute a kipan a lungsim hoih khollo, A khua sung tangvalte in, “Lingpaak” a cih uh, Heh Cing a kici nungakno khat om hi.
Do Thangin tua nu hoih sa sim pian ahih manin tuate innah nitak simin va lengna thei zelzel hi. Tua nu in zong na ngaih bawl mahmah hi. Tua thu Luan Vung in a theih ciangin, “Ka ta aw, tuate’ innah hawhhawh nawn kei in, bang hang hiam cih leh, tuate innkuan pen a nu a pa a kipan, milung sim khel, migilo namte hi. Zi ding na zon ciangin a nu apa bang ci mi hiam cih en masa in, khangluite in sakhi a pisan, a no san, khaikha a gui-ah gah na ci uh hi. Tua nu tawh kithei-in hong ki teng le ucin a sawtlo-in ei gel nuta hong ki mudah sakin hong kikhen sak ding hi. Mihing ih cih pen melhoihna a thupi masa hilo a, lungsim a thupi pen ahi hi. Melhoihna in zuaupi hi a, ngahbanna in a mawkna hi. Melhoih ningtui kidawn theilo ci hilo ahiam, a mel hoihna bek na ip lah leh tua melhoihna in a sawtlo-in a bei pak ding hi lel a, lungsim hoihna ahih leh, ih dam sung teng a bei theilo ahi hi.” ci-in thu hilh den hi. Do Thang in anu’ thu gen hi sa mahmah hi napin, Heh Cing’ melhoihna kheng zo tuanlo ahih manin a tawpna-ah hong kingai mahmah uh hi.
Tua banga Do Thang in angaih mahmah ciangin Luan Vung zong, tate’ ngaih ahih takin ih laksak kei diam, ci-in a tapa’ zi dingin Heh Cing hong pi uh hi.
Heh Cing zong kum khat sung khawng thusiam mahmahin Luanvung bang it bawl mahmah ahih manin Luanvung in zong, Mo tuak kisa sim keei hi. A hi zongin kum thum bang hong kiten khit uh ciangin Heh Cing hong kipan pianpian hi. Zanin alupna tung vuah apasal ho thapthapin, A nu a ngaih loh ding bekbek genin nei den hi. Tua banga a zi in apasal Do Thang’ tungah a nu a gensiatsiat ciangin Do Thang in zong a nu a muh dah ding hong kipan ta hi.
Khatvei, nitak khat a tanaute khat in Luan Vung zu sim dingin sam uh a, Luan Vung zong zu sim dingin hong pai khia hi. A zu sim kalin Heh Cingte nupa in ak go-in taangngan huan uh hi. Luan Vung zong zan kim tak ciangin a zu simna pan an nelo-in hong ciah hi. Inn a tun ciangin an a zon leh, mulo ahih manin a gil kial mahmah hi. “An lah om kei in ka ihmut theih tuam khak leh, tuibuk hong muam dih ning e,” ci-in khin tungah a za-ip la dingin ip sung hong hon leh tangngah leh aksa a kikoih mu hi. Luan Vung zong nuam mahmah a, “Ka lai, ka ta te’n hih lai-ah an ong siah ahi ve maw,” ci-in nuamin meikha-ah tucil pipeih kawmin ne dingin, a tangngan a lomlom laitakin Lupna tung pan Heh Cing hang sa-in hong tho khia a, “Mit pil mah teh, mu zo mah teh, zan kim zan khang a kuan vak dinga hong sawl ahiam? Na vahna-ah an ne lo maw, kuan vak a hong sawl? hih ante zingsang cianga, ka nute ka kholh dinga ka koih hilo maw,” ci-in hak zakzak hi. Luan Vung zong a cih nading theilo-in khitui luang ngalhngalh kawmin a lupna tung zuan khialkhial hi. Lupna tung pan ihmu thei lo-in khui sasa hi. Do Thang in a lawmnu’ kiangah, “Nute lah ih velh liang ding lah hilo, pasal khawng va nei lel leh hoih mah ding hi ven, ci-in a zi’ kiangah gen hi.
Lupna tungah ihmu theilo a khitui naptui tawh a om, Luan Vung in, lupna tung pan atapa’ kampau a zak ciangin, “Kah pau dalhdalh kawmin, “Ka ta Do Thang, pasal hong neihsan sawm hi leng, na neu lai pekin nei khin ning, nang bekbek kong khualna hangin tu dong pasal neilo-in khitui naptui tawh a om hing,” a cih leh Do Thang hehin lupna tung pan tho to-in singkhuah khat tawh a nu sat dingin hong kithawi hi. Tua lai takin A nu in, “Ka ta Do Thang, hong sat sawm takpi na hih leh, kilawm na sak na penpen hong sat o, ka lu nong sat ding lah na nek na dawn ding, ka puakpuakna hi. Ka nung nong sat ding lah a suk ato a nang kong puakna hi. Ka khut nong sat ding lah, na nek na dawn ding mah ka bawlbawlna hi. Ka gil nong sak ding lah, kha sawm sung vilvel nang kong paina hi, Tua ahih manin kilawm na sak na penpen hong sat in,” A cih leh Do Thang in zong sat ngamlo-in azi kiangah lum kik khual hi. A zi in, “Nang pasal, nute lawmlawm kihta, heh o, ka nik teng o,” ci-in na hap suk hi.
Ni khat Do Thang bawng zong dingin gam sungah pai hi. A om loh kalin a zi in inn ngakin an na huan hi. Nitak ciangin gam sung pan gilkial sa-in Do Thang hong ciah a, an ne dingin ankuang hong um hi. Do Thang in a sikkeu tawh meh hong ciap leh, meh al salo ahih manin, “Bang dia meh ci sawhlo,? Ci-in anu sikkeu tawh sat dingin hong kithawi leh a nu in, “Khei, kei huan hi kei ei, Heh Cing’ huan hi ei,” ci-in ling kalkal kawmin gen hi. Heh Cing zong hehin a nu ngau damdam hi. Do Thang pen a zi’ heh ding a dah tawntung mi khat ahih manin a zi lungkim lo cih a theih ciangin, ameh ciam kik a, “E, meh al kei ka cih leh, tu sun a ka hai thuk nekna ka kam a pak man hi e,” ci-in nu halhal kawmin gen hi. Luan Vung khasia lua mahmah ahih manin a tutna pan khakham vei-in pukin si hi.
A nu’ sih zawh kum thum khit ciangin Do Thang pen a nu ngai-in thumthum a, mitam pi in nuihsan hiuhiau bek uh hi. A nu ngai-in a gamtat nasate kisikin a thumthum hangin, tui bua sa lah kiluak kik thei nawnlo ahih manin a mawkna suak lel hi.

Tua hih amanin hih tangthu in thu tampi hong phawksak hi.

1. Nungak tangvalte in zi hoih pasal hoih ih neih ding athupi pen ahih mah bangin zi hoih pasal hoih ih deih leh, a nu apa bang ci mi hiam ci kan leng, Khangluite in sakhi a pi san, a no san a cih mah bangin mihing in ih nu leh ihpa’ lungsim puak zia ki sun ciat hi. A gilote’ ta mah gilo, ahaite’ ta mah hai, a pilte’ ta mah pil a dikte’ ta mah dik hi.

2. Lai siangtho sungah leitungah nuamsa a na nuntakna a sau theih nadingin na nu leh na pa zahtak in, Ephet 6:2 a cih mah bangin, nu leh pa itna in Leitungah Thupha sanna hi a, nuleh pa simmawh mite mi nuamsa om ngeilo uh hi. Na nu na pa na simmawh leh, (or) na teek nu na teekpa na simmawh khak leh, nang zong ni khat ni ciangin mi’ teknu, mi’ teek pa na suah ni hun hong om ding a hih manin, khanglui te in thallam cilsiat ei’ tungah hong tu kik a cih mah na bang ding hi. Lai siangtho in zong, mi khat in khaici a vawh bangin agah at hi, na ci a, Paunak sungah zong, nu leh pa a simawh mite khuamial sunga meivak ki sumit bang,” na ci hi. Tua bek thamlo-in Na nu a teek ciangin simawh bawl kei in, a nu leh apa a simawhs mi in hamsiatna thuak ta hen, na ci lai hi.

3. Na zi zong it inla, na nu na pate zong it mahmah in. Na zi hangin na nu leh na pa simmawh bawl kha kei in, Na zi in na nu leh napa hong it sak theih kei leh zong thungetsak in. Tua hi leh Pasian in na innkuan sung uh anuam dingin hong bawl sak ding hi. Innkuan nuam, bang kua nuam ih cih pen vantung gam malep na kici liang hi.


YYYYYYYYYYY€€€YYYYYYYYYY

Posted in: Zomi Tangthu