နေလောင်ဒဏ်ခံရသူများအတွက်

 

    

 နေပူထဲမှာပဲ အလုပ်လုပ်နေရတဲ့ သူတွေဟာ နေလောင်ဒဏ်ခံရလို့ အသားအရေတွေ ညိုမည်းလာနိုင်တယ်နော်။ တချိူ့သူတွေကတော့ တင်းတိပ်တွေ မှဲ့ခြောက်တွေထွက်လာရော။ တင်းတိပ်၊ မှဲ့ခြောက်တွေ၊ အမဲစက်တွေ ရှိသူတွေအတွက် အလှဖျက်တဲ့ တင်းတိပ် နဲ့  အစက်အပျောက်တွေရဲ့အဝေးဆုံးမှာ ဆိုတဲ့ ပို့စ်တွေကို တင်ပြီးပါပြီ။ ခုကတော့ နေပူထဲမှာအလုပ်လုပ်နေရတဲ့သူတွေ၊ နေပူထဲသွားလာနေရသူတွေ နေလောင်ဒဏ်မခံရအောင် နေလောင်ထားတာတွေ သက်သာအောင် ဘယ်လိုတွေဂရုစိုက်ရမယ်ဆိုတာလေးတွေကို သူငယ်ချင်းတို့ကို ပြောပြမယ်နော်။

- နေပူထဲမထွက်ခင် အနည်းဆုံး နာရီဝက်ကြိုပြီးတော့ နေရောင်ခြည်ဒဏ်ကနေကာကွယ်ပေးနိုင်တဲ့ SPF
အနည်းဆုံး ၃၀ လောက်ပါတဲ့ Suncream တွေကို မျက်နှာရော၊ ခြေလက်တွေပါ နေရောင်ခြည်နဲ့ ထိတွေ့ရမယ့်
နေရာမှန်သမျှကို လိမ်းပေးပါ။

- အကျီလက်ရှည်၊ ဘောင်းဘီရှည်တို့ကို ၀တ်ဆင်ပါ။ အရောင်ဖျော့ဖျော့ ပွပွချောင်ချောင် ချည်သားအ၀တ်အထည်တွေက အကောင်းဆုံးပါပဲ။

- အပြင်ထွက်တော့မယ်ဆိုရင် ထီး၊ ဦးထုပ်၊ နေကာမျက်မှန်တွေကို မမေ့ပါနဲ့။

- ဖြစ်နိုင်ရင် မနက် ၁၀ နာရီမှ ညနေ ၃ နာရီကြားမှာ နေပူထဲမထွက်ပဲ အရိပ်ထဲမှာပဲနေပါ။ အလုပ်လုပ်မှ ဖြစ်မယ်ဆိုရင်လည်း နားနားပြီး လုပ်ပါ။

- နေပူထဲ အလုပ်လုပ်ရတဲ့သူတွေက ရေများများသောက်ပေးပါ။ ရေခဲရေတော့ မသောက်ပါနဲ့။ ချွေးထွက်များရင် ဓာတ်ဆားရည်သောက်ပါ။

- နေပူထဲ အလုပ်လုပ်ရတဲ့အခါ သာမန်ထက်ပိုပြီး စွမ်းအင်ကုန်တဲ့အတွက် အစားအစာများများစားပေးဖို့လည်း လိုပါတယ်။

- အရက်၊ ဘီယာ၊ ကော်ဖီတို့ဟာလည်း ရေဓာတ်ဆုံးရူံးမူကို ဖြစ်စေလို့ မသောက်သင့်ပါဘူး။

နေလောင်ပြီးသွားရင်တော့ နဂိုအတိုင်းပြန်ဖြစ်ဖို့ကို အချိန်တော့ယူရမှာပါ။ ခု နေလောင်ကွက်ရှိတဲ့သူတွေ အတွက် နေလောင်ကွက်တွေကို သက်သာပျောက်ကင်းသွားအောင် ဘယ်လိုလုပ်ရမလဲဆိုတာကို ပြောပြမယ်နော်။ တစ်ပတ်ကို တစ်ကြိမ်လောက်ပဲ လုပ်ပေးရမှာပါ။

- သံပရာရည်အနဲငယ်၊ သကြားနဲ့ ဂလစ်စရင်း ၂ စက်လောက်ကိုရောပြီး Facial Scrub အနေနဲ့သုံးရင် နေလောင်တာကို သက်သာပျောက်ကင်းစေပါတယ်။ အသားအရေကို နူးညံ့လှပစေပါတယ်။ Scrub နဲ့ မျက်နှာကို ညင်ညင်သာသာလေးပွတ်ပေးပြီး ၂ မိနစ်လောက်နေရင် ရေနွေးလေးနဲ့ ဆေးချလိုက်ရုံပါပဲ။ ခန္ဓာကိုယ် တခြားနေရာတွေမှာလဲ သုံးနိုင်ပါတယ်။

- ဂျူံမူန့်၊ ဒိန်ချဉ်နဲ့ ခရမ်းချဉ်သီးအရည် အနည်းငယ်ကိုရောပြီး နေလောင်တဲ့ နေရာတွေပေါ်မှာ ညီညီညာညာလေး လိမ်းပေးပါ။ ပြီးတော့ ခြောက်သွားတဲ့ အခါ ( သို့ ) မိနစ် ၂၀ - ၃၀ လောက်ကြာတဲ့အခါ ရေအေးလေးနဲ့ ဆေးချလိုက်ပါ။

- သံပုရာသီးကို တစ်ခြမ်းခြမ်းပြီး နေလောင်ထားတဲ့နေရာကို ပွတ်ပေးပါ။ ၅ မိနစ် ၁၀ မိနစ် ကြာတဲ့အခါ ရေစင်အောင် ဆေးလိုက်ပါ။ တစ်ပတ်ကို ၂ ကြိမ်ထက်တော့ ပိုမလုပ်မိပါစေနဲ့။

- ပျားရည် စားပွဲတင်ဇွန်း ၂ ဇွန်း နဲ့ သံပုရာရည် ၁ ဇွန်းကို သမအောင် ရောမွှေပြီး နေလောင်တဲ့နေရာတွေကို
လိမ်းပေးပြီး ၂၀ မိနစ်လောက်နေပြီး ရေဆေးချလိုက်ရင်လည်း အစွမ်းထက်တဲ့ နည်းလေးပါပဲ။

- ဂျူံမူန့်စားပွဲတင်ဇွန်း ၁ ဇွန်း၊ သံပရာရည် ၂ - ၃ စက်၊ နွားနို့စိမ်း ၂ ဇွန်း တို့ကိုရောမွှေပြီး ညီညီညာညာလေး
လိမ်းပါ။ ၂၀ မိနစ်လောက်နေရင် ရေဆေးချလိုက်ပါ။ တပတ်ကို တစ်ကြိမ်လုပ်ရင် တလလောက်နေရင်
သိသိသာသာသက်သာလာမှာပါ။

ရင်နှင်းသူငယ်ချင်းလေးတွေ နေလောင်ခြင်းကင်းပြီး အလှပိုနိုင်ကြပါစေရှင်..

Posted in: Beauty