ဘုရားသခင်ကို သိကျွမ်းခြင်း

ဝိညာဉ်ရေးရာတွင် ကြီးထွား ရင့်ကျက်ရန် အရေးကြီး ကြောင်း လူတိုင်းက လက်ခံကြသည်။ သို့သော် ထိုသို့ ၀ိညာဉ်ရေးရာ ရင်ကျက်ကြီးထွားရန် သီချင်းဆိုတတ်ဘို့၊ တရားဟောတတ်ဘို့၊ စကားလုံး လှလှဖြင့် ဆုတောင်း တတ်ဘို့၊ Sunday School သင်တတ်ဘို့၊ ကျမ်းစာသင်တတ်ဘို့ စသည် လုပ်ဆောင်မှုများကို ကျွမ်းကျင် ပိုင်နိုင် စွာ လုပ်ဆောင်တတ်ဘို့ ဦးတည်ကြိုးစားအားထုပ်ကြသည်ကို တွေ့မြင်ရပါသည်။ ထိုသို့ လုပ်ဆောင်မှု ဟူသမျှ သည် အပြင်ပိုင်း လုပ်ဆောင်မှု များသာဖြစ်ပြီး၊ ၀ိညာဉ်ရေးရာ အတွင်းပိုင်း တိုးတက်မှုအတွက် မစဉ်းစား မလုပ်ဆောင်ကြချေ။ ထိုသို့ ၀ိညာဉ်ရေးရာ အတွင်းပိုင်း တိုးတက် ကြီးထွားရန် အဓိက လိုအပ်ချက်မှာ ဘုရားသခင်ကို သိကျွမ်းခြင်းသာလျှင် ဖြစ်ပါသည်။

ကောလောသဲ ၁း၁၀-၁၁

ဆုတောင်းသော အချက်ဟူမူကား၊ သင်တို့သည် ကောင်းသောအကျင့် အမျိုးမျိုး တည်းဟူသော အသီးကိုသီးခြင်း ဘုရားသခင်ကို သိသောညဏ် တိုးပွားခြင်း၊ ရှိသဖင့် လည်းကောင်း၊ ၀မ်းမြောက် သော စိတ်နှင့် အရာရာ၌ သည်းခံခြင်း၊ စိတ်ရှည် ခြင်း အလိုငှါ၊ ဘုန်းကြီးသော တန်ခိုးတော် အတိုင်း ခွန်အားနှင့် ပြည့်စုံသဖြင့် လည်းကောင်း၊ ခမည်းတော် ဘုရား၏ ကျေးဇူးတော်ကို ချီးမွမ်းလျက် သခင် ဘုရားနှင့် ထိုက်လျောက်စွာ ကျင့်၍ အရာရာ၌ နှစ်သက်တော် မူစေခြင်းငှါ၊ ပညာ အမျိုးမျိုး၊ ဓမ္မညဏ် အမျိုးမျိုးအားဖြင့် အလိုတော်ကို အကုန်အစင် နားလည်ပါမည်အကြောင်း ဆုတောင်း ပဌနာပြု၏။ (ကောလောသဲ ၁း၁၀-၁၁)

ရှင်ပေါလု၏ ဆုတောင်း

ကောလောသဲမြို့တွင် ရှိသော အသင်းတော်ရှိ အသင်းသားများ အတွက် ဆုတောင်းပေး သောအခါ အထက်တွင် ဖေါ်ပြထားသော အပြင်ပိုင်း လုပ်ဆောင်ချက်များ တိုးတက်လာရန် ဆုတောင်းခြင်း မပြုခဲ့ပါ။ ထိုအရာများ မလိုအပ်၍ မဟုတ်ပါ။ ထိုအရာများသည် ၀ိညာဉ်ရေးရာ ရင့်ကျက်လာသူများက အလိုအလျောက် လုပ်ဆောင်နိုင် မည်ဖြစ်သည်။ ရှင်ပေါလု ဆုတောင်းပေး သောအချက်မှာ ဘုရားသခင်ကို သိသောညဏ် တိုးပွားလာစေရန် အဓိက ဆုတောင်း ပေးခဲ့ပါသည်။

သင်တို့၏ ၀ိညာဉ်ရေးရာ တိုးတက်မှု ရှိစေရန် ထိုအချက်ကို ဦးစားပေး ပြောလိုပါသည်။ ထိုသို့ ဆိုရာတွင် ကျမ်းစာများ ပိုမို တတ်ကျွမ်း လာရန် အရေးကြီးသည်ဟု မဆိုလိုပါ။ ဘုရားသခင် ၏အကြောင်းကို ကိုယ်တိုင် သိကျွမ်းလာဘို့ အဓိက ပြောချင်ပါသည်။ ဘုရားသခင်၏ အပေါ်ယံ အကြောင်း တရားများကို ဆိုလိုခြင်း မဟုတ်ပါ။ မိမိ အသက်တာ ထဲက နှလုံးသားဖြင့် သိကျွမ်းလာ ခြင်းကို ဦးစားပေး ပြောဆိုလိုပါသည်။ ၀ိညာဉ် ရေးရာကို တိုးတက်သည်ဟု ဆိုရာတွင် သင်ကိုယ်တိုင် မည်သို့ သတ်မှတ်ထားပါသနည်း။ လုပ်ဆောင်မှု တိုးတတ်ရန် လိုသည်ဟု ထင်မြင်ပါ သလား၊ (သို့) နှလုံးသားထဲမှ ဘုရားသခင်ကို ရင်းနှီး ကျွမ်းဝင်မှုဖြင့် သိကျွမ်းပါသလား။

စစ်မှန်သော ဘုရားသခင်ကို သိကျွမ်းခြင်း

ခရစ်ယာန်တစ်ဦး အနေဖြင့် အသက်ရှင်ရာ၌ အခြေအနေ အားလုံးအတွက် ဘုရားသခင်ကို သိကျွမ်းဘို့ လိုအပ်ပါသည်။ ကယ်တင်ခြင်းရဘို့၊ အသက်တာ လျှောက်လှမ်းဘို့၊ အမှုတော် ဆောင်ရွက်ဘို့ အခြေအနေ အားလုံးတွင် ဘုရားသခင်ကို သိကျွမ်းဘို့ လိုအပ်ပါသည်။ ဘုရားသခင်သည် မည်ကဲ့သို့ အရည်အချင်း၊ ဂုဏ်တော်များ ရှိပါသနည်း။ မည်ကဲ့သို့သော ပုဂ္ဂိုလ် ဖြစ်ပါသနည်း။ လောကထဲ တွင်ရှိသော အခြားသော ဘုရားများနှင့် ခြားနားချက်များက မည်သို့ရှိပါလဲ။ အစရှိသဖြင့် များစွာ လေ့ လာဘို့ လိုအပ်ပါလိမ့်မည်။ ထိုဘုရားက မိမိ အသက်တာကို မည်သည့် အရာများ လုပ်ဆောင် ပေးသနည်း ဆိုသော အချက်များကို ကိုယ်တိုင် ကိုယ်ကျ မိမိ အသက်တာ အားဖြင့် သိကျွမ်းဘို့ လိုအပ်ပါ သည်။

ထိုသို့ ဆိုရာတွင် ခရစ်ယာန် ဖြစ်လာသောသူက မိမိသည် ဘုရားကို သိလို့၊ ယုံကြည်လို့ ခရစ်ယာန် ဖြစ်လာတာ ဘဲ။ သိပြီးသားဘဲ အစရှိသည်ဖြင့် ဆိုနိုင်ပါသည်။ လက်ရှိ အခြေအနေတွင် ဘုရားသခင်ကို သိကျွမ်းပြီး ဖြစ်သည့်အတွက် နောက်ထပ် ဘာများ သိစရာ လိုပါသေးသနည်းဟု မေးကောင်း မေးနိုင်ပါသည်။

ခရစ်ယာန် ဖြစ်လာပြီးနောက် အသင်းတော် ထဲတွင် ပါဝင်သည့် အချိန်၌ အခက် အခဲများစွာ တွေ့နိုင်ပါသည်။ ကိုယ်ကာယပိုင်း အခက်အခဲ၊ စိတ်ဓါတ်ရေးရာ အခက်အခဲ၊ ၀ိညာဉ်ရေးရာ ပြဿနာများ၊ စသည်တို့ အပြင်၊ သြ၀ါဒနှင့် ဆိုင်သော ပြဿနာများ၊ အသင်းတော် ထဲတွင် မိမိ မခံယူနိုင်သည့် ဆုံးဖြတ်ချက် ပြဿနာ အစရှိသည့် ပြဿနာများ ဖြစ်သည်။ ထိုအရာများကို ကိုင်တွယ်ရာတွင် မိမိ ကိုယ်တိုင် အခက်အခဲ အဆင်မပြေမှု မြောက်များစွာ တွေ့ကြုံရ လေတော့သည်။ မိမိ ကိုယ်တိုင်က ယုံကြည်ခြင်း ရှိပါသည်။ ထိုယုံကြည်ခြင်းကို မည်ကဲ့သို့ အသုံးချနေပါသနည်း။ ထိုအချိန်မျိုးတွင် မိမိ၏ ယုံကြည်ခြင်းသည် မိမိအားကိုးသော ဆရာသမားများ၊ မိဘများ၊ သူငယ်ချင်းများ တွင်သော် လည်းကောင်း၊ တစ်ခါတစ်ရံ မိမိပိုင်ဆိုင်သည့် စီးစိမ်ဥစ္စာများ အပေါ်တွင်သော် လည်းကောင်း၊ တစ်ခါတစ်ရံ မိမိ၏ပညာ အစွမ်းအစများအပေါ်တွင်လည်းကောင်း တင်ထား တတ်ကြသည်။ ထိုသို့ ဖြစ်ရခြင်း အကြောင်းမှာ ဘုရားသခင်ကို သိသင့် သလောက် မသိသောကြောင့် ဖြစ်သည်။ ဘုရားကို စိတ်မချသောကြောင့် ဖြစ်သည်။ ထိုဘုရားက မိမိကို မည်မျှလောက် ချစ်မြတ်နိုးပြီး၊ မည်မျှလောက် တာဝန် ယူသည်ကို သိနားလည်ခြင်း မရှိသောကြောင့် ဖြစ်သည်။ အကယ်၍ သင်သည် ဘုရားသခင်ကို အမှန်တကယ် သိကျွမ်းပြီ ဆိုပါက မိမိ၏ ပြဿနာ အခက်အခဲများအတွက် ထိုဘုရားသခင်ကိုသာ ယုံကြည် အားကိုးတော့ မည်ဖြစ်သည်။ ထိုသို့ ယုံကြည်ခြင်းဖြင့် ထိုဘုရားသခင်ပေါ်တွင် ရပ်တည် လိုက်ပြီဆိုပါက သင်၏ ပြဿနာ အခြေအနေများ မည်ကဲ့သို့ ရင်ဆိုင်ကြုံတွေ့ရသည် ဖြစ်ပါစေ အရှုံး မရှိတော့ပါ။

စစ်မှန်သော အားပြည့်ခြင်း

ဘုရားသခင်ဆိုတာ ဘုရားဘဲ ဖြစ်ပါတယ်။ ဘုရားဆိုတာ လူမဟုတ်ပါ။ ဘုရားဆိုတာ ဖန်ဆင်းရှင်သာ ဖြစ်ပါ တယ်။ ရှိပြီးသားအရာကို ထပ်မံ ပြင်ဆင်လုပ်ဆောင် သောသူသည် ဖန်တီးရှင် သာဖြစ်သည်။ ဖန်ဆင်းရှင်ဆို သည်မှာ မည်သည့်အရာမျှ မရှိသောအရာထဲတွင် တန်ခိုးတော်ကို အသုံးပြုပြီး အမှန်တကယ် ရှိလာအောင် ဆောင်ရွက်သောအရာကို ဖန်ဆင်းရှင်ဟု ခေါ်ပါသည်။ ဘုရားသခင်သာ ရှိလျှင် အားလုံး အဆင်ပြေပါသည်။ ထိုဘုရားသခင်သည် ရှိပြီးသားအရာကို တစ်ခုမျှ အခြေမခံဘဲ လိုအပ်သည့် အချိန်မှာ လိုအပ်သလို လုပ်ဆောင် ပေးနိုင်သော အရည်အချင်းကို ပိုင်ဆိုင်ထားသောသူ ဖြစ်သည်။ ကျွန်ုပ်တို့ ကိုးကွယ်သော ဘုရားသည် အရာခပ် သိမ်းကို ဖန်ဆင်းသော ဖန်ဆင်းရှင်ဖြစ်သည်။ ထို့ကြောင့် ကျွန်ုပ်တို့သည် အရာခပ်သိမ်းကို ဖန်ဆင်းသော ဖန်ဆင်းရှင် ပေါ်တွင် သင်နှင့် ကျွန်ုပ်တို့၏ ယုံကြည်ခြင်းကို တည်ဆောက်ထားရန် တိုက်တွန်းလိုပါသည်။

သင့်ဘ၀ထဲတွင် မည်သည့် အကြောင်းကြောင့် အားငယ်နေ ပါသနည်း။ ဟေရှာယ ၄၀း၃၁ တွင် ဘုရားကို မျှော်လင့်သော သူတို့သည် အားပြည့် ကြလိမ့်မည်ဟု ဖေါ်ပြထားပါသည်။ ပိုက်ဆံရှိ၍ အားပြည့်ခြင်း၊ ဂုဏ်ရှိ၍ အားပြည့်ခြင်း၊ အပေါင်းအသင်းကို မှီ၍ အားပြည့်ခြင်း၊ အစရှိသည် တို့သည် အမှန်တကယ် အားပြည့်ခြင်း ဟုတ်ပါသလား။ ဘုရားသခင်ကို ကြည့်ရှု မျှော်လင့်ပြီး အသက်ရှင်သော သူတို့သာလျှင် အမှန်တကယ် အားပြည့်သော သူများ ဖြစ်ကြပါသည်။ ထိုသူတို့ ကိုသာ ဘုရားသခင်ကို သိကျွမ်းသောသူ ဟု ခေါ်ပါသည်။ သင်ကိုယ်တိုင် ဘုရားသခင်ကို သိကျွမ်းသောသူ ဖြစ်ပါစေ။

Posted in: တရားဟောချက်များ