LEITUNGBUP AA OM ZOMITE TUNGAH THUZAKSAKNA

Kawlgam, Vaaigam leh Leitungbup aa om Zomite khempeuh itna tawh kong hopih hi. I biak i paai Pasian in na omom na tuntunna mun uhah cidam ludamna, lawhcin mapaina thuphate hong piakim ciat tahen!

Nungkum December kha sungin A Masa pen GZA Makaite Khawmpi Kalaymyo ah kibawl a, mi 250 kah ding a kisam pen 345 hong kah thei hi. Hih i et ciangin Zominamte kipawlkhawm nuam-in nasem khawm nuam takpi hihang, cih kimu-a lungdam-huai ka sa mahmah hi. Hih kikhopna tawh kisai-in i GZA General Secretary pa Rev. Dr. Do Kham in khahkhiatna le thuzaksakna hong nei zo, cih zong ka thei-a, ka lungdam hi. Hih thu a za peuhpeuh in lungdamna leh mailam ah nasia taka panhuan ding thu nong genkiknate uh ka na ngah a, lungdamna tampi ka nei hi. Tu-in zong i mailam kalsuanna ding tawh kisai-in thu nih thu thum kong zasak nuam hi.

A masa penin, kumsim kumsim-in February kha (20) ni-a i bawl i Zomi Nam Ni bawl ding hun hong tungkik ta ahih manin i tuntun, i om-omna ah i minampihte tawh bawlkhawm liailiai-a thunget khawmna leh Zomite mailam kalsuanzia ding i kigen, i kikup, i hawmkhawm dingin kong phawksak nuam hi. 2010 kum Tedim khuapi a kibawl Kum Za Cin Jubilee pawipi ah Zomi Nam Ni bawl den dinga kiciamna i laksa hi-a, tua bangmah-in i bawlkim nadingin kong hanthawn hi.

A nihna ah, Kalaymyo GZA Makaite kikhopna panin Zomibup adingin seppah ding nasep lian pawl khat kigeela, tuate zong i General Secretary pa in hong taangko khiazo ding hi. Tua hi-a, a kul bangbang-in semkhawm ding le mapan’ khawm dingin kong theisak nuam hi. Sum le paai tawh pan’khawm pah ding bek hizaw lo-in i lungsim mahmah tawh pan’ khawm phot ding kisam ding hi.

A thumna ah, a beisa huna kong gen-genzel mah bangin GZA pen a omsa kipawlnate valhtum ding leh susia dinga kipawlna hilo hi. Zomi khempeuh nasepkhopna dinga vaihawmna hizaw hi. Tua ahih manin i om-omna peuh panin Zomi ading vai kihawm khempeuh leh Zomite phattuamna ding, khantohna ding vai kihawm khempeuh i pan’khawm pah ding thupi mahmah ding hi.

A lina ah, Zomite a beisa taangthute enkik-in tua a beisa huna i thanemnate tungah dingding, awk-awk nawn lo-in tua i thanemnate pan suakta (liberate) a khut kilen-in mailam i phuutkhawm ding leh lam i sialkhawm ding thupi mahmah ding hi, cih kong phawksak nuam hi. I kibat lohna leh i kilamdan’na nengnengte ultungsak lo-in i kibatna lianpen ahi i biak Pasian leh Ama’ hong piaksa i Zomi Nam hihnate phawkin khut kilen-in mapang khawm ni, ci-in kong zawn nuam hi.

I biak Pasian in leitungbup aa om Zomi vannuai Ama’ thupha, le a daihna hong piakim ciat tahen!

Itna takpi tawh,

Rev. Dr. S. Pau Khan En
GZA Makaipi
zomidaily

Posted in: Tedim New