GZA Central Committee ka muh zia (Towards Unity)

Global cih kammal pen leitungbup ahuam a gen hia, Globalaziation cih ciangin leitung khuata abang lel hita cih thu gennopna kammal hi. Ahi zongin leitung pen a kipat-a kipan a phak cia mah pha tawntunga, hih leitung ii lamdanna le liatna (mystery) pen thukin zai mahmah banah kuamah in tua thusim mukhia theikhia zo tuan lo ahih manin hih leitung pen Globalization kammal tawh neusek zawh ding hi ngei lo hi. Leitung a thupiangte zong a hunzui-in a piang hi a, eite’ hanciam zawh thu le zuih zawh ciin zawh, nuntakpih zaw thu tawh kisai lo hi.

Gentehna, Nidanga, leitungah om ngei ganhing lianpipi Dinosaur te tuhun ah a om nawn lohna pen Pasian geel mah hi. Piancil hunlai-a, kigen milian pipite zong tuhun ah om nawn lo hi. Pasian in a tuaci ding mah a, hoih a sak zawk hi a, tua ganhing mihingte’ hoih zawhna, zuihzawhna le nuntakpihzawhna thu ah Pasian in a thu nga zaw lo hi. Ahun zui a nuntak ding cih thu kihilh masak ding hi masa lo a, Lai Siangtho Pasian’ kammal zui-a nuntak ding hi zaw hi. Tuhun hita leh Lai Siangtho Pasian’ kammal tawh a kituah kei leh nuntakpih ding hi deksuai lo hi. Tua pen Pasian seh (divine mandate) ahi hi.

 

Tua banah, hih anuai-a Biakna lam pan a ih kiseh Makaipi 6te zong Pasian seh (divine mandate) mah hi pah hi. Amaute’ kibatlohna talent ciat om a, tua pen Christian’s Unity in Diversity ahi hi. Tua Christian’s unity in diversity pen biakna dang Hindu, Muslim, Buddhism te tawh unity in diversity khawm thei ngiat lo ding hi. Banghang hiam cih leh Christian le Biakna dangte’ kibatlohna pen ki-el puak ngiat hi. Bangtawh kibang hiam cih leh 96 le 69 tawh kibang hi. Ahi zongin Christian innkuan sungah ih kibatlohna pen a bulpite hi lo-in a nengnengte bek ahi hi. Bangtawh kibang hiam cih leh 66 ahi kei leh 99 tawh kibang hi.

Biakna dangte tawh Christian bel nakpi takin a bulpite mahmah pan kipanin kilamdang ngiatin kibang lo hi. Tua kibatlohna a kibat sak sawm, a dikzul sawm Christian makaite pen dikzulte (compromises) te hi uh a, tuate pen Lai Siangtho in na kidawm un a cihte ahi uh hi. GZA makaite’ kibatlohna kilamdannate gawmtuah-in sep khop ding le kipum khat ding ahihna uh bel muhdah huai lo-in, etlawm zaw hi. Amaute’ kibatlohnate anuai-a bangin ka gen nuam hi.

 

1. Prof. Rev. Simon Pau Khan En, Ph.D. President---Thu khih siam (Liberal)
2. Bishop Felix Lian Khen Thang, J.C.D. Vice President---Thu zuun siam (Ecumenical)
3. Rev. Chin Do Kham, D.Min., Ph.D. General Secretary---Thu gen siam (Pentecostal)
4. Rev. Do Suan Mung, D.D. Assistant Secretary---Thu hilh siam/faithful preacher—(Evangelical)
5. Rev. Gin Khan Khual, Ph.D. Member---Tha piak siam
6. Rev. JM Ngul Khan Pau, D. Miss. Member---Thu kaihkhop siam…

 

By- Evan. Suang Dal

Emmanuel Baptist Church

No. 123, Judson Street

Thazin 2/ Kalaymyo

Sagaing Division

Posted in: Tedim New