ZEI SU KUA HIAM?

Lungdam pawi thupha mikim tungah hong tung ta hen. Midangte'n thu tuamtuam hang tawh innsung, khuasung lamdungte zemin, snow la peuh Santa Claus la peuh sa ziahziah ta leh December khabup pen ei Christiante aadingin lungdam kha ahi hi. Pawlkhatin LST sungah om kei ci ta leh Zeisu' suah pawi sa'ngin a muak huai zaw birthday dang i nei tuan kei-a, a ni a hun dik lo hi, kicici ta leh tuate sa'ngin Pasian takpi mi bangin hong piang hong suak hi, cih i theihna mah a kicing lungdam pawi ahi hi. Hebrew 1:1-3 sung tungtawnin "Zeisu Kua Hiam?" Cih i kikum nuam hi.

"A beisa hunah Pasian in kamsangte zangin i pu i pate tungah lam tuamtuam tawh tamveipi thu na gen ngei zo hi. Ahi zongin tu hun nunung ciangin leitung vantung na khempeuh a bawla a zat, a tawpna ah na khempeuh a luah dingin a seh a Tapa zangin eite tungah thu hong gen hi. Tua Tapa in Pasian' minthanna hong tangkhia saka Pasian' lim taktak mah hong pua-in, Ama' kampauna tawh vantung buppi pai-in a kip hi. Mihingte a mawhna panun a siansak khit ciangin Vanglianpipa Pasian' taklam, vantungah a tu hi."

 

Zeisu kua hiam? Cih hong kidong leh na bangci dawn sawma, midangte'n hong koici dawn dingin na um hiam? Midangte'n Kamsang khat hi, mihoih khat hi, hong cih sak lel ding uha, nang aadingin Zeisu kua hiam? Cih i kidotnop pen ahi hi. Tanglai Israelte hun pek panin a lamet a ngakngak uh Pasian' kamciam thupi thum oma, Kamsang, Siampi le Kumpi ahi hi.

 

1. Kamsang.

"A beisa hunah Pasian in kamsangte zangin i pu i pate tungah lam tuamtuam tawh tam veipi thu na gen zo hi. Ahi zongin tu hun nunung ciangin vantung na khempeuh a bawla a zat, a tawpna ah na khempeuh a luah dingin a seh A' Tapa zangin eite tungah thu hong gen hi".LST lui sungah mipil, kumpi, thukhente lapuaksiam cih bang a om hangin Kamsangte zaha kizang om lo hi. Piancil pan Thuhilhkikna bu gukte Moses' gelh hi-a, Joshua pan Kumpite nihna bugukte Kamsangte gelh mah hi-in Isaih pan Malakhi bu sawmleguk zong Kamsangte gelh mah ahih manin LST luibup sehthumsuah sehnih pen Kamsangte gelh na hi hi. A tawpna pen Malachi 4 sungah Topa' ni ma-in Kamsang Elijah kong pai sak ding hi, cih tawh thuciamlui bei-in kum 400 sung bang Pasian' Kamsang kuamah omlo-in gamdaih hun (Four hundred silent years) kici hi. Tua Kamsangte khempeuh lakah Moses bangin Pasian tawh maitang kituaha a hopih kuamah om lo-a Pasian in Israelte tungah Moses tawh kibang Kamsang dang khat na kham hi (Thkna.18:18). LST lui Malakhi sunga hong pai ding Kamsang Elijah pen LST thakah hong pai takpi-a tua pa pen Tuiphumpa Johan na hi hi (Mat.3:4;11:7-14; 17:9-13; Lk.1:17) Tua manin Tuiphumpa Johan pen Thuciamlui Kamsang nunung pen kici hi. Mat.11:13 sungah "Banghang hiam cih leh Tuiphumpa Johan thuhilh a kipat hun ciang dong, kamsangte khempeuh le Moses Thukham khempeuh in, hih vantung ki-ukna thu gen belin a nei uh hi". Johan in mipite kiangah kei ka neu semsem dinga Amah lian semsem ding hi, Ama' khedap khau sut ding zongin ka kilawm zo kei hi, na ci hi. Tanglai Kamsangte'n mipite tung thu a gen simun "Topa'n ci hi" ci den uha tun tanglai peka kamsangte tungtawna thu a gengenpa Topa in Mihing in hong piang, eite tawh hong omkhawm hi ta ahih manin mipite tung thu a gen simin "Ken kong cih in ah" Hong ci ta hi. Vanah a ciah ding ciang in zong Kamsang dang hong kamciam nawnlo-a, Huhpa Kha Siangtho bek hong kamciam hi. Tu-in Zeisu pen tangtawng peka a kilamen a kingakngak Kamsang Lianpenpa hi ta hi. Ama' zumpi ahi Kamsang hihna munah Muhammad kikoih theilo hi, Gautama Buddha kikoih theilo hi. Zomite aadingin Pau Cin Hau hi, kimawk cih theilo hi. Kamsang khempeuhin Amah Zeisu' thu gen pen in a nei hi-a, a tawpna ah Pasian in Zeisu tungtawnin thukhempeuh hong gen khin ta hi. Ama' thu um-in i zuih ding bek kisam lai hi. Amah bek mah vantung Pa kiang tunna lampi hi-a, Amah lo lampi dang om lo hi. Ken a man takpi kong cih inah khatvei na suak kik kei leh Pasian' gam na mu kei ding hi (Jn.3) Hong ci hi. Moses tung tawnin Thukham hong kipia-a ahi zongin Zeisu Chris tungtawnin hehpihna leh thutak hong pai hi (Jn.1:17).

 

2 Siampi.

"Tua Tapa in Pasian' minthanna hong tangkhia saka Pasian' lim taktak mah hong pua-in, Ama' kampauna tawh vantung buppi pai-in a kip hi. Mihingte a mawhna panun a siansak khit ciangin..."

Israelte tungah a dang Pasian' kamciam khat leuleu in Siampi ahi hi. Late 110:4 sungah Melchizedek bangin tawntung Siampi ding na kamciam hi. Hih Melchizedek pen LST in na tawm gen mahmah le mi thupi mahmah khat na hi hi. LST siamte'n upmawhna tuamtuam a gen uh hangin, a pianna nu le pa kigen lo-in a kipat hun le a bei hun kithei lo hi. Salem Kumpipa le Sangpen Pasian' Siampi hi-a, Kumpi le Siampi a semkhawm amah bek hi pah hi. Thuman Kumpipa (King of righteousness) le Kilemna Kumpipa (King of Shalem) kici hi. Bangzah takin thupi diam cih leh Abraham nangawnin sawma khat na pia hi (Pian.14:17-24; La.110:4; Heb.7) Tua tawh kibang siampi pen tangtawng pek pana ki-lamen, a kingaklah mahmah ahi hi. Heb.4:14-16 ""...eite in Pasian omna vantung a va tung khin sa, Siampi Lianpen ahi Pasian' Tapa Zeisu nei khin i hih manin i saansa upna kip takin len ni. Eite neih Siampi Lian penpa in i ginatlohnate ah eite a hong hehpih theilo ding hilo hi...i kisap hunin eite hong huh dingin hehpihna le dikna thupha i ngah theina dingin, kimuanna lungsim tawh hehpihna tokhom va zuan ciat ni" ci hi. Tanglai siampite tuuno' sisan tawh siangtho pen munah luta thu hong ngetsak cih ciang bek hi lo-in eite Siampi ahi Zeisu in Pasian' Tuuno Amahmah' sisan kengin khut tawh kibawl ahilo Siangtho pen mun Pasian kiangah eite aadingin hehpihna tokhom tung pan Siampi hong sep sak hi. Ih mawhna a mai theih nadingin eimau mah banga mihing a hi, i Pastor te i Phungzi te le Pope te kianga pai ding hi lo-a, Pasian' minthanna hong tangkhia saka Pasian' lim taktak hong pua, vantung leitung A' vangliatna tawh a len, mihingte mawhna a silsiang eite Siampi Zeisu kiang zuan ni. Ih mawhnate sibangin a sandup hangin vuk bangin kong ngo sak ding hi, hong zuan in ci hi. Tua Siampi Zeisu kiang na zuan nai hiam!!!

3.Kumpi.

"Vanglianpipa Pasian' taklamah a tu hi".

Israelte tungah Pasian' kamciam a ngaklah mahmah uh le tu donga a ngakngak lai uhin Kumpi ahi hi. Jer.23:5 "En un, Topa in kong cih inah, Keimah in David' suan lak panin kumpi dingin a diktat mi khat ka khankhiatsak ni hong tung ding hi. Amah gamuk siam mahmah dinga, gamsungah thumaan thutang tawh hong khen ding hi". Tuni dongin Israelte'n hih a Kumpipa uh hong pai nailo sa uha khitui luangin hong pai mengmeng ta in ci'n thungen ngen lai zen uh hi. Zeisu in Jerusalem khuapi-ah lapi'ta lano tung tuangin a pai hangin na theilo uha, na nial uh hi. Kamsangte' thugen a tangtunnate le Amah hihna na kigengen ta leh um zo tuan lo uh hi. Tuiphumpa Johan nangawn in, a dang ka lamen lai ding uh hiam, ka ngakngakpa uh nang mah na hi taktak hiam? ci'n dong sak lai zen hi. Zeisu in, cinate kidam sak khin, mittawte in khuamu ta, khelbaite lampai theita mizawngte tung vantung ki-ukna thu kigen ta hi, cih bangin Zeisu a kigengen hang tawm bekin um-in a tawpna-ah eite' mawhna thaman pia dingin singlamteh tungah sihna hong thuak ta hi. Ni thum khit ciangin sihna zo in, Zeisu gualzawhna sang pen tawh hong tho khin ta hi. Tua manin Amah pen min khempeuh sa'ngin min lian pen kipia-a kumpite' Kumpi, topate' Topa suak ta hi. Naungek bangin hong suak ding hi nawnlo-in na Honpa le na Topa dingin na lungtang kongkhak hong hon in, kong lut dinga, na tawntung Honpa le Kumpi kong hi ding hi, hong ci ahi hi. Zeisu in Kamsang, Siampi, Kumpi' za ngah ta hi. Amen.

 

Sanggam aw, Israelte'n amau Kumpi dinga hong pai Zeisu a up theihloh uh pen, Pasian in nang le kei hong itna taktak hi-a, minam kideidanna om lo, Zeisu a um khempeuh Pasian' ta suah theihna ding thuneihna a piak pen, bangzah lungdam huai hiam? Hihzah itna leh hehpihna kicing, a lian mahmah Gupkhiatna thu don lo-in na om kha lai hiam??? Tu a i dawn Zeisu pen nang aadingin kua ahi hiam. Na biakna, na pawlpi in, hong len, hong mengcip-in Zeisu, Kamsang ahihna Siampi ahihna le Kumpi ahihna na telzawh nai kei leh nadangte sa'ng a thupi zaw Pasian' kammal LST simin thungen-in hih thute ngaihsun dide dih in. Na mawhna pan na suahtakna ding gupna na ngahna dingin, Kamsang dang kisam kei teh, Siampi, Pastor le Father cihte kisam kei teh, kumpidang kuamah kisam kei teh. Zeisu bek na kisam lai hi. Na hihna bangbang tawh hong zuan ta in. Tukum Christmas pen nang aading taktak hi sak nuam hi hang. Topa'n thupha hong pia ta hen.

 

Hong suak Zeisu' min tawh

 

Rev. Lian Za Tuang

1624 Westlake Dr. # 2403
Conway, AR 72034, USA

source FGA Tulsa

Posted in: Tedim New