Zolai Seminar le Zomi Concert lawh cing

Zomi Christian Literature Society (ZCLS) le ZACC kipawlna tawh abeisa Dec. 11-13, 2011 sung Zolai Seminar, Tahan Tuiphum Pawlpi ah kinei a, nisim in mi 190 val kihel thei cih kiza hi. Hih hun sungah thusinna le nitak hunzatna nopcitak kinei in, thusinte le nitak thungaite in phattuamna le thangahna tampi kingah cih kiza hi. Zolai thusinna (Zolai Seminar) ah anuai-a Siate in mapangna nei uh hi.
1. Zokam Kilamzia (by Rev. Khoi Lam Thang, GS - The Bible Society of Myanmar)
2. Khantohna (by Dr. Cing Pum Nem, Lawibual Baptist Church)

Nitak simin Zomi Concert kinei a, Zomi sungah tumging lam siam pawlte "Ever Smile Band" le a nunungpen nitakin Falcon Band te kihel thei hi. Zomi Lasa siam Esther Cing Sang, Lia San Nuam, Steven Vocal Band, Shepherds Vocal Band (a thak), Zomi Idol- 2008 a ngah Tg. Thangta, Zomi Idol- 2011 a ngah Lia Niang le Top 10 sung pan pawl khat zong kihel thei uh a tha kingah mahmah cih kiza hi. Music pawlte le lasa pawlte ZCLS le ZACC in bangmah kipia zo lo a, a maute in bel "minam le Pasian itna tawh ka pilna uh le ka siamnate a zangkhia hi ung " ci-in gen uh hi. Mai lamah Pasian le i minam adingin a pil, a siamnate uh azang zo semsem dingin Pasian in thupha piaksak hen.

Zolai Seminar hun sungah Kihel Siate:

-Dec. 11 ni nitakin, Dr. Cing Pum Neam,
-Dec. 12 ni nitakin, Rev. Khoi Lam Thang le
-Dec. 13 ni nitakin, Rev. Dr. Do Suan Mungte in Pasian kammal tawh hanthotna hong pia uh a, mipi in tha kingah pha mahmah hi.

Rev. Lang Suan Thawn
ZACC Secretary

Posted in: Tedim New