ယူ-၂၂ အသင်း လေ့ကျင့်ရေး ဆက်လုပ်ရန် ကလပ်များနှင့် အဖွဲ့ချုပ် ညှိနှိုင်းမည်

မြန်မာနိုင်ငံ ဘောလုံး အဖွဲ့ချုပ်သည် ဇွန်လထဲတွင် မြန်မာနိုင်ငံက အိမ်ရှင်အဖြစ် လက်ခံကျင်းပမည့် အာရှ အသက် (၂၂)နှစ်အောက် ဘောလုံး ပြိုင်ပွဲ ခြေစစ်ပွဲသို့ ၀င်ရောက် ယှဉ်ပြိုင်ရန် လေ့ကျင့်နေသည့် ယူ-၂၂ အသင်းအား လေ့ကျင့်မှုများ ပြုလုပ်နိုင်ရန် အတွက် နေရှင်နယ်လိဂ် ကလပ်အသင်း တာဝန်ရှိသူများနှင့် တွေ့ဆုံ ညှိနှိုင်းမည် ဖြစ်ကြောင်း သိရသည်။

ယူ-၂၂ အသင်းသည် ကိုရီးယားလူမျိုး ပတ်ဆောင်ဟွာ၏ စီစဉ်မှုဖြင့် ကိုရီးယားတွင် (၃)ပတ်ကြာ လေ့ကျင့်ရေးနှင့် ခြေစမ်းပွဲများ သွားရောက် ကစားခဲ့သည့် အသင်းဖြစ်ကာ ရန်ကုန်သို့ မေလ (၈)ရက်နေ့က ပြန်ရောက် လာခဲ့သည်။ မေလ (၉)ရက်နေ့ နံနက်ပိုင်းက ဘောလုံး အဖွဲ့ချုပ် ဥက္ကဋ္ဌနှင့် တွေ့ဆုံခဲ့ပြီး နောက်တွင် အသင်းသား များအား သက်ဆိုင်ရာ ကလပ်အသင်း များထံသို့ ပြန်လည် စေလွှတ်ခဲ့ပြီး ဖြစ်သော်လည်း နည်းပြချုပ် ပတ်ဆောင်ဟွာ၏ တောင်းဆိုမှုအရ တစ်ပတ်လျှင် နှစ်ရက်၊ သုံးရက်ခန့် စုစည်း လေ့ကျင့်ခွင့် ရရန် ပြင်ဆင်နေခြင်း ဖြစ်သည်။ ထို့အတူ AFC Cup ပြိုင်ပွဲကြောင့် အသင်းနှင့်အတူ လိုက်ပါနိုင်ခြင်း မရှိခဲ့သည့် ရန်ကုန် ယူနိုက်တက်နှင့် ဧရာဝတီ ယူနိုက်တက်တို့မှ ကစားသမား များကိုလည်း ပြန်လည် စုစည်းစေမည် ဖြစ်သည်။

သို့သော် ရပ်နားထားသည့် မြန်မာ နေရှင်နယ်လိဂ် ပြိုင်ပွဲမှာ ယခုတစ်ပတ် ပိတ်ရက်တွင် ပြန်လည် စတင်တော့မည် ဖြစ်ရာ ကလပ်အသင်း များအနေဖြင့် ကြားရက်များတွင် ၎င်းတို့၏ ကစားသမား များအား ယူ-၂၂ အသင်းအတွက် စေလွှတ်ပေးရန် ကိစ္စနှင့် ပတ်သက်၍ မည်ကဲ့သို့ ဆုံးဖြတ်မည် ဆိုသည်မှာ စောင့်ကြည့်ရမည် ဖြစ်သည်

Posted in: အားကစား