သုံးဘီးကားတွေက GEC လို့ခေါ်တဲ့ ဝန်ထမ်းသက်သာချောင်ချိရေး

မကွေးတိုင်း သရက်မြို့ကနေ ပိတောက်ပင်ရေနံမှော်ကိုပြေးဆွဲနေတဲ့ သုံးဘီးကားတွေက GEC လို့ခေါ်တဲ့ ဝန်ထမ်းသက်သာချောင်ချိရေး
အသင်းကို တစီးကို ကျပ်ငွေ ၂ သိန်းနှုန်း ပေးသွင်းရမယ်လို့ ဆိုတဲ့အတွက် သုံးဘီးကားပိုင်ရှင်တွေအခက်အခဲဖြစ်နေကြတယ်လို့ သတင်းရရှိပါတယ်။

ဒီကိစ္စနဲ့ပတ်သက်လို့ သုံးဘီးကားပိုင်ရှင်တဦးဖြစ်တဲ့ ဦးတင်ထွန်းက RFA ကိုအခုလိုပြောပါတယ်။

"လိုင်းအတင်းဝင်ခိုင်းတယ်ခင်ဗျ။ သရက် အုပ်ချုပ်ရေးမှူး ဦးသန်းလွင်လို့
ပြောပါတယ်။ သူရယ် ထောင်ပိုင်ကြီးရယ် က မော်တော်ယဉ်က လူကြီးတွေကို အတင်းခြိမ်းခြောက် အတင်းဟောက်ဟက်ပြီးတော့ လိုင်းဝင်ခိုင်းတာ၊ ပြီး ၂ သိန်းအတင်းတောင်းတယ်ခင်ဗျ။ ကျွန်တော်တို့က
မော်တော်ယဉ်မှာ ၃ သောင်းခွဲပေးပြီး လိုင်းဝင်ထားပါတယ်ခင်ဗျ။ "

ပိတောက်ပင်ရေနံမှော်ဟာ သရက်မြို့ကနေ ၈ မိုင်လောက်ဝေးပြီး နေ့စဉ်
မှော်ထဲသွားတဲ့လူတွေ ဥဒဟိုရှိနေတဲ့အတွက် မထသလိုင်းဝင် သုံးဘီးကားတွေက အလှည့်ကျပြေးဆွဲနေတာဖြစ်ပါတယ်။

ဒီအခြေအနေမှာ ဒေသခံအာဏာပိုင်တွေစုဖွဲ့ထားတဲ့ GEC လို့ခေါ်တဲ့ ဝန်ထမ်းသက်သာချောင်ချိရေး အသင်းက သူတို့ဆီကငွေတောင်းဖို့
မြို့နယ်အုပ်ချုပ်ရေးမှူးအစည်းအဝေးကနေ ဆုံးဖြတ်ချက်ချ လိုက်တာလို့ သရက်မြို့နယ် မော်တော်ယဉ်လိုင်းပေါင်းစုံထိမ်းသိမ်းရေးဌါနရုံးက အတည်ပြုပြောဆို ပါတယ်။

တကယ်လို့ GEC အဖွဲ့ကို ငွေ ၂ သိန်းမပေးသွင်းရင် အဲဒီလိုင်းမှာ
ပြေးဆွဲခွင့်ပိတ်ပင်ခံရမှာဖြစ်ပြီး GEC အသင်းပိုင်ကားတွေက အစားထိုးဝင်ရောက်ပြေးဆွဲမှာဖြစ်တယ်လို့သိရပါတယ်။

သရက်မြို့မှာ သုံးဘီးကားတစင်းကို သိန်း ၃၀ နီးပါးပေါက်ဈေးရှိပြီး၊
ဒေသခံတောင်သူတချို့က လယ်ရောင်းပြီး ကားထောင်ထားကြတာလဲ
ရှိတယ်လို့သိရပါတယ်။

ဒီလိုလုပ်ကိုင်စားသောက်ရာမှာ တချို့က သုံးဘီးကားတစီးလုံးပိုင်ပေမယ့်၊ တချို့က ကားတစီးကို ၂ ဦးစပ်၊ ၃ ဦးစပ် စုဝယ်ပြီး လုပ်ကိုင်စားသောက်နေကြတာလို့သိရပါတယ်။

Posted in: တိုင်ကြားစာ