USA ah Zomi Siampiza ngah kibehlap

Zogam, Tedim gam huam Sezang khuami Sia Lian Za Tuang pen tulaitak a ma omna mikang pawlpi mimal 1000 val omna Central Baptist Church, Arkansas, USA, te in December 18,2011 ni-in Siampiza (Ordination) piakna thupitak nei h cih kiza hi. Tua hun sungah Mikang Pastor ordination ngahsa mi 30 valte in thungetsakna le thupha piakna Arkansas a om Zomiteng in Zopuan vive silhin biakinn ah uap ciat uh a, Siapa inn zongah lungdamkohna le lopna hun nuamtak zang khawm thei uh hi.  Tua Siampiza piakna hunpi sung mahah Sia Lian Za Tuang mahmah in a tate nihte tuiphumna nei ci hi.

Sia Lian Za Tuang pen Ngeina lawki biakna sung pan khangkhia hi in, a sanggam pa Rev. Thang Cin Mang (EBC) makaihna tawh kum 7 a phak akipan biakna sungah khang khia hi. 1992 kum sungin a paneu kawlzi nei pa kiangah kumkhat sung om, tua sungin a kithuahpih kawl khamangthang teng a muhna tungtawn in Pasian' nasepnopna lianpi nei hi. 1993 kumin Thitsetgone Calvary EBC ah ahih theih bangin Pasian' nasep kipan hi. 1994-2000 dong Tedim le India-ah laisiang tho sinna nei-in a sang man ciangin, Grace Baptist Church, Yangon-ah innvak sia sem hi. 2004 kumin USA tung a, a omomna ah pawlpi mah tawh kizomin ahun ngah bangin Pasian' nasep ding na lunggulh den khat ahi hi.

Tu latakin Arkansas , US ah Zomi tam nai het lo kawm kalah tuate makaih theih dingin Sia Lian Za Tuang in Siampiza hong ngah manin lungdampihna i pulak hi. Arkansas a om Zomi tengin a mau kipawlna min pen Zomi Bible Groupte ci in phuak uh a, tuni ciangciang thangah in nuamsa mahmah uh cih kiza hi. Siapate innkuan le Arkansas Zomite khempeuh Topan thupha pia hen. Mikangte lakah Zomite khatin Siampi za (Ordination) hong ngah manin Tongsan Media pan lungdampihna i puak hi.

Source: Upa Cin Khan Tung

Zomi Bible Group Arkansas

USA

Posted in: Tedim New