နော်ဝေး ဒု-နိုင်ငံခြားရေးဝန်ကြီး ဦးဆောင်တဲ့အဖွဲ့ချင်းမိုင်မြို့မှာ သတင်းစာရှင်းလင်း

(ဓာတ်ပုံ- RFA- ချင်းမိုင်မြို့မှာ သတင်းစာရှင်းလင်းပွဲမှ နော်ဝေ ဒုနိုင်ငံခြားရေးဝန်ကြီး Torgeir Larsen)

နော်ဝေး ဒု-နိုင်ငံခြားရေးဝန်ကြီး ဦးဆောင်တဲ့အဖွဲ့ချင်းမိုင်မြို့မှာ သတင်းစာရှင်းလင်း

မြန်မာနိုင်ငံက တိုင်းရင်းသား လက်နက်ကိုင်အဖွဲ့တွေရဲ့ အပစ်အခတ် ရပ်စဲရေးနဲ့ပတ်သက်ပြီး နော်ဝေးနိုင်ငံက ဘယ်လို ဦးဆောင်ဦးရွက်
ပြုပေးနေတယ် ဆိုတာနဲ့ နယ်စပ် အကူအညီပေးရေး ကိစ္စတွေကို ဒီကနေ့ ညနေပိုင်းက ထိုင်းနိုင်ငံ ချင်းမိုင်မြို့မှာ ရှင်းလင်း ဆွေးနွေးပွဲ တခု လုပ်ခဲ့ပါတယ်။

ဒီကနေ့မနက်ပိုင်းက မြန်မာနိုင်ငံကနေ ပြန်လည်ထွက်ခွာလာတဲ့
နော်ဝေးနိုင်ငံ ဒု-နိုင်ငံခြားရေး ၀န်ကြီးနဲ့အဖွဲ့ဟာ ထိုင်း-မြန်မာ နယ်စပ်က အဲန်ဂျီအိုတွေ လူမှုအဖွဲ့အစည်းတွေနဲ့ မြန်မာ သတင်းမီဒီယာတွေကို ဖိတ်ခေါ်ပြီး ၂ နာရီကြာ ရှင်းလင်း ပြောဆိုခဲ့တာ ဖြစ်ပါတယ်။

မြန်မာနိုင်ငံက တိုင်းရင်းသားဒေသတွေမှာ အပစ်အခတ် ရပ်စဲရေး စတင် လုပ်ဆောင်နေတာတွေဟာ ငြိမ်းချမ်းရေး အစပျိုးလိုက်တာ ဖြစ်ကြောင်း၊ အစိုးရနဲ့ တိုင်းရင်းသား လက်နက်ကိုင် အင်အားစု နှစ်ဖက်စလုံးမှာ ငြိမ်းချမ်းရေး ရလိုတဲ့ ဆန္ဒတွေ တွေ့ရပေမယ့် ဘယ်လောက်ထိ အကောင်အထည်ဖော် ဆောင်ရွက်နိုင်မလဲ ဆိုတာကို စောင့်ကြည့်သွားမယ်
လို့ ဒုနိုင်ငံခြားရေးဝန်ကြီးက ပြောဆိုပါတယ်။

အပစ်အခတ် ရပ်စဲရေး စတင်ပြီးနောက် နိုင်ငံရေးအရဆက်လက် ဆွေးနွေးမှု
အောင်မြင်နိုင်ရေး အပါအ၀င် ဒေသခံ ပြည်သူလူထုကို ဘယ်လို အကူအညီ
မျိုးတွေ ပေးသွားရမယ် ဆိုတာတွေကို အဓိက ဆွေးနွေးသွားခဲ့ကြောင်း
ဆွေးနွေးပွဲ တက်ရောက်ခဲ့တဲ့ ငြိမ်းချမ်းရေးနဲ့လူထုတရားမျှတမှု အဖွဲ့ ဒါရိုက်တာ ဒေါက်တာ သောင်းထွန်း က အခုလို ပြောပါတယ်။

"အဓိကကတော့ လက်နက်ကိုင် ပဋိပက္ခတွေ ဖြစ်ပွားခဲ့တဲ့ တိုင်းရင်းသားတွေရဲ့ ဒေသတွေမှာ လိုအပ်ချက်တွေကို သူတို့ စပြီးကြည့်ပြီးတော့ အစမ်းသဘောမျိုးနဲ့ပေါ့နော်၊ ကူညီမယ်ဆိုတဲ့ သဘောပါပဲ၊ မကြာသေးခင်က ကျောက်ကြီးကို သွားပြီးကြည့်တဲ့အခါမှာ တိုင်းရင်းသားတွေရဲ့ အဓိက လိုအပ်ချက်ကတော့ ပထမ လုံခြုံမှုဆိုတာ လိုအပ်တယ်၊ ဒုတိယကတော့ နေထိုင်စရာတွေ အစားအသောက်တွေ၊
နောက်တခုကတော့ အသက်မွေးဝမ်းကျောင်း လုပ်ငန်းတွေပေါ့နော်။"

ဒီဆွေးနွေးပွဲ တက်ရောက်လာသူတွေ ကလည်း အခုလက်ရှိ အစိုးရက အကောင်အထည် ဖော်နေတဲ့ ပြည်တွင်း အပစ်အခတ် ရပ်စဲရေး အပါအ၀င် မြန်မာနိုင်ငံ ငြိမ်းချမ်းရေး အတွက် အမေရိကန် ဒေါ်လာ ၅ သန်းပေးမယ့် အကူအညီတွေကို ဘယ်လိုစီမံခန့်ခွဲမှာလဲ ဆိုတာတွေကို မေးမြန်းခဲ့ကြတယ်လို့ ဆက်ပြောပါတယ်။

"အခုလက်ရှိလုပ်နေတဲ့အပေါ်မှာ သံသယတော့ ရှိကြတာပေါ့နော်၊ အစိုးရက လူကြားကောင်းအောင် လုပ်နေတာလား၊ နိုင်ငံတကာ အကူအညီရအောင် လုပ်နေတာလား၊ တခါ နိုင်ငံတကာ အပိုင်းကရော ဒိုနာတွေ အပိုင်းကရော စီးပွားရေး လုပ်ချင်လို့များ တွန်းပြီးတော့ အတင်းဖြစ်အောင် လုပ်နေ
တာလား၊ ဒါကြောင့်မိုလို့ ကချင်ဖက်က ဆိုရင် ပြောသွားတယ်၊ အပစ်အခတ် ရပ်စဲရေး ဖြစ်သွားပြီးတော့ ဖွံ့ဖြိုးရေး လုပ်ငန်းတွေဆိုပြီး
ရောက်လာတယ်၊ ဒီဖွံ့ဖြိုးရေး လုပ်ငန်းတွေက ပြည်သူလူထု အတွက် အကျိုးမရှိ ရုံတင်မကဘူး။ အခုဆိုရင် ဒါလက်နက်ကိုင် ပဋိပက္ခတွေ
ပြန်ဖြစ်တဲ့ အဆင့်ထိအောင် ရောက်လာတယ်ပေါ့နော်၊ ဒါတွေကို ဘယ်လိုကာကွယ်ကြမလဲပေါ့နော်။ နောက်တခုက ဒီရံပုံငွေတွေ
ရောက်သွားလို့ရှိရင် ဘယ်လို စီမံခန့်ခွဲမှာလဲ၊"

ဆွေးနွေးပွဲ အပြီးမှာတော့ နော်ဝေ ဒု နိုင်ငံခြားရေး ၀န်ကြီးက နှစ်ဖက်
စလုံးက ငြိမ်းချမ်းရေးကို တကယ် ဖော်ဆောင်နိုင်တဲ့ အစွမ်းအစတွေ ရှိသလား ဆိုတာကို နော်ဝေအစိုးရ အနေနဲ့ စောင့်ကြည့်သွားမှာ
ဖြစ်ပြီး ပြည်တွင်း ပြည်ပမှာရှိတဲ့ လူမှု လူ့အဖွဲ့အစည်း တွေနဲ့ တိုင်ပင် ဆောင်ရွက်သွားမယ်လို့ ပြောဆိုသွားပါတယ်။

RFA-Burmese

Posted in: နိုင်ငံတကာ